«Հայաստանի պատանի երգիչներ»-ի սաները պահանջում են վերականգնել երգչախմբի շենքը
ԵՐԵՎԱՆ, 15 ՍԵՊՏԵՄԲԵՐԻ, ԱՐՄԵՆՊՐԵՍ: «Հայաստանի պատանի երգիչներ» երգչախմբի սաները սեպտեմբերի 15-ին բողոքի ակցիա են իրականացրել երգչախմբի շենքի վերակառուցման պահանջով:
Ինչպես հաղորդում է «Արմենպրես»-ը, երգչախմբի սաները գեղարվեստական ղեկավար Տիգրան Հեքեքյանի գլխավորությամբ իրականացրել են բողոքի ակցիա՝ փակելով Արամի փողոցը:
«Սա աղետ է: Թեկուզ եթե անգամ կառույցվի մի նոր շինություն, մենք այնտեղ կաշխատենք: Որևէ մեկը պե՞տք է արդյոք հոգա մեր նախկին շինարարների, ճարտարապետների թողած կոթողների մասին»,- մտահոգվում է Հեքեքյանը:
Երգչախմբի գեղարվեստական ղեկավարը նշում է, որ պիտի մինչև վերջ պայքարեն: Եթե, այնուամենայնիվ, շենքը փուլ գա, պահանջելու են, որ այն հիմնովին վերակառուցեն: «Մենք պահանջում ենք, որ շենքը փրկեն, պատը ամրակայեն, հողային ապարները ամրացնեն: Սա է կարևորը»,- ասում է Հեքեքյանը:
Ավելի վաղ ՀՀ արտակարգ իրավիճակների նախարարությունից դիմել և հորդորել էին լքել Արամի 23 հասցեում գտնվող «Հայաստանի պատանի երգիչներ» երգչախմբի շենքը, քանի որ այն վթարային է: