Հայկ Մարությանը քաղաքապետի պաշտոնում ընտրվելու դեպքում փոփոխություններ է խոստանում աղբահանության և տրանսպորտի ոլորտում
ԵՐԵՎԱՆ, 11 ՍԵՊՏԵՄԲԵՐԻ, ԱՐՄԵՆՊՐԵՍ: Երևանի ավագանու արտահերթ ընտրություններում «Իմ քայլը» դաշինքի ցուցակի առաջին համար Հայկ Մարությանն ընտրվելու դեպքում փոփոխություններ է խոստանում մի շարք ոլորտներում՝ մասնավորապես, աղբահանության և տրանսպորտի: «Արմենպրես»-ի հաղորդմամբ՝ քաղաքապետի թեկնածու Հայկ Մարությանը Դավթաշենում դաշինքի քարոզարշավին ներկայացրեց իրենց նախընտրական ծրագրի կետերից:
«Տրանսպորտի ոլորտում վերանալու են բոլոր գծերն ու գծատերերը: Լինելու են նոր երթուղիներ, նոր կանգառներով, նոր մենեջմենթով, որոնք իրականացնելու են պրոֆեսիոնալ օպերատորները: Ներմուծելու ենք մեծ, միջին, փոքր չափի ավտոբուսներ: Բոլորը համապատասխանելու են միջազգային ստանդարտներին: Դրանք հարմարեցված են լինելու հաշմանդամություն ունեցող անձանց կարիքներին»,- ներկայացրեց Մարությանը:
Նա նշեց՝ գործելու է միասնական տոմսերի համակարգ: Տոմսը լինելու է ժամկետով՝ մեկ ժամվա, օրվա կամ տարվա համար: Այդ ժամանակում քաղաքացիները կարող են օգտվել Երևանի հասարակական տրանսպորտի բոլոր միջոցներից որքան ուզեն: Հայկ Մարությանը վստահեցրեց՝ դա անհամեմատ ավելի մատչելի կլինի: Միաժամանակ պահպանվելու է տրանսպորտի 100 դրամանոց տոմսը:
Նախատեսում են նաև մետրոյի առնվազն մեկ կայարանի կառուցում Աջափնյակում՝ «Թումո»-ի հարևանությամբ: Նախատեսում են նաև մետրոյի «Գործարանային» կայարանում շարժն ակտիվացնելու նպատակով հարակից տարածքում աշխուժացնել քաղաքային կյանքը՝ կառուցել բիզնես կենտրոններ, բնակելի շենքեր:
Թեկնածուն մտահոգիչ համարեց նաև աղբահանության հարցը։ Լուծումը պատկերացնում է մրցակցային դաշտի ստեղծումով։ «Ուսումնասիրելու ենք ոլորտը, երկրորդ կամ երրորդ օպերատորներ ենք մտցնելու ոլորտ»,- վստահեցրեց Մարությանը:
Նա նաև նշեց՝ եթե նույնիսկ շատ օպերատորներ լինեն, քաղաքը պետք է մաքուր պահեն քաղաքացիները:
Հայկ Մարությանը մի շարք փոփոխություններ է նախատեսում նաև քաղաքային մանկապարտեզներում, պոլիկլինիկաներում:
- Մանե Ադամյանը վստահ է` Ֆրանկոֆոնիայի տնտեսական ֆորումը կարևոր դեր է
ունենալու Հայաստանում ինովացիայի զարգացման համար
- Նիկոլ Փաշինյանը Երևանի ավագանու ընտրությունները համարում է արդար և
մրցակցային ընտրություններ անցկացնելու համար կարևոր քննություն
- Ընտրությունները տեղի են ունեցել ազատ ու արդար պայմաններում. ՀՅԴ
- «Երևանի հանրություն» դաշինքը կայացած է համարում Երևանի ավագանու
ընտրությունը
- Հայկ Մարությանը պատրաստ է ամեն վայրկյան ծառայելու հանուն Երևանի
բարեկեցության