Հավատում եմ, որ Հայաստանի և Վրաստանի համագործակցությունը տարբեր ոլորտներում ավելի կակտիվանա. Մամուկա Բախտաձե


ԵՐԵՎԱՆ, 10 ՍԵՊՏԵՄԲԵՐԻ, ԱՐՄԵՆՊՐԵՍ: Վրաստանի վարչապետ Մամուկա Բախտաձեն հավատում է, որ Հայաստանի և Վրաստանի միջև հարաբերությունները տարբեր ոլորտներում ավելի կակտիվանան:

Ինչպես հաղորդում է «Արմենպրես»-ը, Երևանում ՀՀ վարչապետ Նիկոլ Փաշինյանի հետ հանդիպումից հետո լրագրողների հետ հանդիպմանը Վրաստանի վարչապետն ընդգծեց, որ քննարկել են տրանսպորտի, էներգետիկայի, մշակույթի, տուրիզմի, հումանիտար ոլորտում համագործակցության հետ կապված հարցեր:

«Մեր երկրներն անկախությունից հետո հաստատել են փոխշահավետ համագործակցություն: Ես հավատում եմ, որ մեր հարաբերությունները տարբեր ոլորտներում ավելի կակտիվանան: Մենք քննարկումների արդյունքում հասկացանք, որ ունենք չօգտագործված ներուժ»,- ասաց Բախտաձեն:

Վրաստանի վարչապետը նշեց, որ առաջիկայում կկայանա հայ-վրացական միջկառավարական հանձնաժողովի նիստ, որի խնդիրն է լինելու տարբեր ոլորտներում երկու երկրների միջև հարաբերությունները զարգացնելու ծրագրի մշակումը:

Մամուկա Բախտաձեն նաև շեշտեց, որ Վրաստանը ողջունում է Հայաստանի Հանրապետության և Եվրոպական Միության միջև հարաբերությունների ակտիվացումը:

 



Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ contact@armenpress.am