Արծվիկ Մինասյանը հարկերից ազատելու վերաբերյալ հայ-ամերիկյան համաձայնագրերը շատ ավելի լայն շրջանակում է տեսնում
ԵՐԵՎԱՆ, 5 ՍԵՊՏԵՄԲԵՐԻ, ԱՐՄԵՆՊՐԵՍ: Հայաստանը ներդրումների պաշտպանության և հարկերից ազատելու վերաբերյալ հայ-ամերիկյան համաձայնագրերի շատ ավելի լայն աշխարհագրություն է պատկերացնում:
Ինչպես տեղեկացնում է «Արմենպրես»-ը, լրագրողների հետ զրույցում այս մասին ասաց ՀՀ տնտեսական զարգացման և ներդրումների նախարար Արծվիկ Մինասյանը:
Պատասխանելով լրագրողի հարցին, թե ինչ փուլում են գտնվում կրկնակի հարկումից խուսափելու հայ-ամերիկյան բանակցությունները, Մինասյանը պատասխանեց, որ ամերիկյան կողմի հետ կրկնակի հարկման վերացման վերաբերյալ բանակցություններն ընթացքի մեջ են:
«Այստեղ երկու-երեք նուրբ հարց կա, որոնք բանակցությունների փուլում են, և չէի ուզենա այս պահին բարձրաձայնել դրանց մասին: Հարցն այն է, որ հայ-ամերիկյան համաձայնագրերի շրջանակում դեռևս ամբողջ պոտենցիալը չենք իրականացրել, բայց նաև կարևոր է, որպեսզի իրականացնենք առավել մեծ թափով աշխատանքներ: Եվ, առհասարակ, երկկողմ ներդրումների պաշտպանության և հարկերից ազատելու մասին համաձայնագրերի շատ ավելի լայն աշխարհագրություն ենք պատկերացնում, ինչը թույլ կտա մեծացնել մեր հնարավորությունները: Եթե ոչ այս տարի, ապա մինչև հաջորդ տարվա կեսերը կունենանք նաև առևտրային ներկայացուցչություն ԱՄՆ-ում, ինչը հնարավորություն կտա շատ ավելի մոտիկից ու անմիջականորեն աշխատելու թե՛ ամերիկյան ներդրողների, թե՛ բիզնես հանրության հետ»,- նշեց Մինասյանը: