Գերմանիան շահագրգռված է մեր տարածաշրջանում խաղաղության հաստատմամբ. ՀՀ ԱԳՆ ներկայացուցիչ
ԵՐԵՎԱՆ, 28 ՕԳՈՍՏՈՍԻ, ԱՐՄԵՆՊՐԵՍ: Գերմանիան շահագրգռված է մեր տարածաշրջանում խաղաղության ու կայունության հաստատմամբ և պատրաստ է քաղաքական պատասխանատվություն ստանձնել այս հարցում:
«Արմենպրես»-ի փոխանցմամբ` այս մասին օգոստոսի 28-ին տեղի ունեցած ճեպազրույցի ընթացքում լրագրողներին հայտնեց ՀՀ ԱԳՆ մամուլի խոսնակի ժամանակավոր պաշտոնակատար Աննա Նաղդալյանը:
«Գերմանիայի կանցլերը Հայաստան կատարած այցի ընթացքում ևս մեկ անգամ վերահաստատել է, որ իրենք հանձնառու են Արցախյան հակամարտության խաղաղ կարգավորմանը: Նա շեշտել է, որ կարգավորումը պետք է տեղի ունենա այն մթնոլորտում, որ բոլոր կողմերը պատրաստ լինեն դրան: Մերկելը նաև նշել է, որ իրենք պատրաստ են քաղաքական պատասխանատվություն ստանձնել այս հարցում»,- ասաց Նաղդալյանը:
ԱԳՆ մամուլի խոսնակի ժամանակավոր պաշտոնակատարի խոսքով` Մերկելը Արցախյան խնդրին անդրադարձել է նաև Բաքվում:
«Բաքվում խոսելով այս հարցի շուրջ՝ Մերկելը նշել է, որ հակամարտության գոտում ապրող մարդկանց խնդիրներին պետք է իրական լուծումներ տրվեն»,- ասաց Աննա Նաղդալյանը:
ԳԴՀ կանցլեր Անգելա Մերկելը օգոստոսի 24-25-ը պաշտոնական այցով ժամանել էր Հայաստան: Այցի ընթացքում կանցլերը հանդիպումներ ունեցավ ՀՀ վարչապետի և նախագահի հետ:
Օգոստոսի 24-ին տեղի ունեցած մամուլի ասուլիսի ընթացքում Մերկելն ու Փաշինյանը հայտնեցին, որ հանդիպումների ընթացքում քննարկվել են երկկողմ հարաբերությունների վերաբերյալ մի շարք հարցեր:
Հայաստան կատարած այցից հետո Գերմանիայի կանցլերն ուղևորվել է Ադրբեջան:
- ԲՏԱ նախարարության և «Ստարտափ Արմենիա» հիմնադրամի միջև փոխըմբռնման
հուշագիր է ստորագրվել
- ԵԱՏՄ-ից Հայաստանի դուրս գալու նախաձեռնություն չկա․ Արման Եղոյան
- Նշվել է Հայ-ռուսական համալսարանի օրը. այս տարի բուհ են ընդունվել
ռեկորդային թվով ուսանողներ
- Հայաստանն ու Հնդկաստանը փոխշահավետ ծրագրեր կարող են իրականացնել մի շարք
ոլորտներում, Արմեն Սարգսյանն ընդունել է Կիշան Դան Դևալին
- Ադրբեջանի իշխանությունները քաղաքականացնում են գերիների վերադարձը. ՀՀ
ՄԻՊ-ը՝ Կոլումբիայի համալսարանի քննարկմանը