1000х90.jpg (78 KB)

Լիլիթ Մակունցն Օպերային թատրոնում արմատական փոփոխությունների կարիք է տեսնում

Armenpress 14:35, 27 Օգոստոս, 2018

ԵՐԵՎԱՆ, 27 ՕԳՈՍՏՈՍԻ, ԱՐՄԵՆՊՐԵՍ: ՀՀ մշակույթի նախարարությունը Ալ. Սպենդիարյանի անվան օպերայի և բալետի ազգային ակադեմիական թատրոնում արմատական փոփոխությունների կարիք է տեսնում:

«Արմենպրես»-ի հաղորդմամբ՝ այս մասին ասաց ՀՀ մշակույթի նախարար Լիլիթ Մակունցը՝ ամփոփելով իր պաշտոնավարման 100 օրը:

Նախարարը նշեց, որ առաջիկայում կներկայացվեն այն բոլոր քայլերը, որոնք անհրաժեշտ են այս մշակույթի օջախի «առողջացման» համար:

«Օպերայի հետ կապված… բավականաչափ խնդիրներ են ներկայացվել աշխատողների, երաժիշտների, երգիչների կողմից: Այդ բոլոր խնդիրների հետ կապված՝ Կոնստանտին Օրբելյանի հետ զրույցներ, քննարկումներ ենք ունեցել, որի արդյունքում պայմանավորվածություն ենք ձեռք բերել, որ այդ խնդիրները պետք է հասցեագրվեն: Բողոքները և՛ գրավոր, և՛ բանավոր ձևով են ներկայացվել:

Օրբելյանի՝ արձակուրդից վերադառնալուց հետո, մենք կանդրադառնանք դրանց, որպեսզի տեսնենք, թե ինչ քայլեր են ձեռնարկվել խնդիրների լուծման համար»,- ընդգծեց Մակունցը:

Նա հավելեց, որ Կ. Օրբելյանի հետ քննարկել են նաև դիրիժորի հաստիքի կարևորության, ինչպես նաև տնօրենի և գեղարվեստական ղեկավարի հաստիքներն առանձնացնելուն վերաբերող հարցերը:



Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ contact@armenpress.am