Ստամբուլում ոստիկանները փորձել են բերման ենթարկել Կարո Փայլանին
ԵՐԵՎԱՆ, 26 ՕԳՈՍՏՈՍԻ, ԱՐՄԵՆՊՐԵՍ: Ստամբուլի Գալաթասարայի հրապարակում բողոքի ակցիայի ժամանակ թուրք ոստիկանները փորձել են բերման ենթարկել հայազգի պատգամավոր Կարո Փայլանին:
«Արմենպրես»-ի փոխանցմամբ, «Շաբաթօրյա մայրերի» բողոքի ակցիային, ի թիվս այլ ընդդիմադիր պատգամավորների, մասնակցում էր նաեւ Կարո Փայլանը:
Նախ ոստիկանները բռնություն գործադրելով հեռացրել են նստացույցի մասնակից կանանց, ապա բերման ենթարկել ակցիայի մյուս մասնակիցներին, որոնք չեն ցանկացել հեռանալ հրապարակից:
Կարո Փայլանը փորձել է պաշտպանել Հրանտ Դինքի որդի Արատ Դինքին՝ թույլ չտալով նրան բերման ենթարկել:
Արատ Դինքի ձերբակալությանը Փայլանի հետ խոչընդոտել են ընդդիմադիր Ժողովրդադեմոկրատական կուսակցության պատգամավորներից Ահմեդ Շըքը, Սերփիլ Քեմալբայը և Հյուդա Քայան։
«Ակօս»-ի տվյալներով, ոստիկանները ձերբակալել են ակցիայի 47 մասնակցի, որոնց ավելի ուշ ազատ են արձակել:«Շաբաթօրյա մայրերի» ակցիայի անցկացման համար կազմակերպիչները քաղաքապետարանից թույլտվություն չեն ստացել:
«Շաբաթօրյա մայրերի» ակցիան անցկացվում է 1995-ից ի վեր ամեն շաբաթ օր: Այն 1980-90-ական թվականներին քրդական շարժման՝ կալանավորված, անհետ կորած կամ քաղաքական սպանությունների զոհ դարձած մասնակիցների մայրերի բողոքի ակցիան է: