Պատանեկան Օլիմպիական խաղերին Հայաստանը կներկայացնի մեկ ըմբիշ
ԵՐԵՎԱՆ, 7 ՕԳՈՍՏՈՍԻ, ԱՐՄԵՆՊՐԵՍ: Հայաստանը պատանեկան Օլիմպիական խաղերի ըմբշամարտ մարզաձևում կունենա մեկ մասնակից:
«Արմենպրես»-ի հաղորդմամբ` լրագրողների հետ հանդիպմանը այս մասին հայտնեց Ըմբշամարտի Հայաստանի ֆեդերացիայի գլխավոր քարտուղար Արայիկ Բաղդադյանը: «Պատանեկան Խաղերին Հայաստանը կունենա մեկ մասնակից` հունահռոմեական ոճի 60կգ քաշային ըմբիշ Սահակ Հովհաննիսյանը»,-ասաց Բաղդադյանը:
Երրորդ պատանեկան ամառային Օլիմպիական խաղերը կկայանան Արգենտինայի մայրաքաղաք Բուենոս Այրեսում: Ստուգատեսը կմեկնարկի հոկտեմբերի 6-ին և կեզրափակվի հոկտեմբերի18-ին: Պատանեկան խաղերին կմասնակցեն մոտ 4000 մարզիկներ, ովքեր կմրցեն 32 մարզաձևերում: Խաղերի բացման և փակման պաշտոնական արարողությունները կկայանան Բուենոս Այրեսում: