Նախարարության ներկայացուցիչը հորդորում է առանց աշխատանքային պայմանագրի գործնական հարաբերություններ չսկսել
ԵՐԵՎԱՆ, 12 ՀՈՒԼԻՍԻ, ԱՐՄԵՆՊՐԵՍ: Աշխատանքի և սոցիալական հարցերի նախարարության աշխատանքի և զբաղվածության վարչության պետ Ժորա Սարգսյանը «Արմենպրես»-ի հետ զրույցում պատմում է առանց գրանցման աշխատելու վտանգների, աշխատաժամանակի և աշխատունակության կարգի մասին:
Նրա խոսքով՝ առանց պայմանագրի աշխատանքը մեծ ռիսկեր է պարունակում. «Չգրանցված աշխատելու վտանգները բավականին շատ են, որովհետև եթե չկա աշխատանքային պայմանագիր, չկան ո՛չ աշխատողներ, ո՛չ վերջիններիս իրավունքների պաշտպանություն: Իսկ նրանք իրենց իրավունքները կարող են պաշտպանել գործատուի մոտ գրանցված ու հաշվառված լինելու դեպքում»,-ասաց նա՝ հավելելով, որ աշխատողին պետք է գրանցեն հենց առաջին վայրկյանից. «Աշխատանքային հարաբերություններ կարող են ծագել միայն համապատասխան պայմանագրի ստորագրումից հետո: Որովհետև հենց դրանով են կարգավորվում վարձատրության չափը, հանգստի ժամանակը և այլ հարցեր: Հակառակ դեպքում չկա պայմանագիր, և չկան պարտավորություններ»,-«Արմենպրես»-ի հաղորդմամբ՝ նշեց նա:
Վարչության պետի հավաստմամբ՝ չի կարելի որոշ ժամանակ աշխատել գործատուի մոտ, հետո կնքել պայմանագիր. «Նույնիսկ փորձաշրջան անցնելիս դարձյալ կնքվում է պայմանագիր, որտեղ նշվում է այդ մասին: Քանի որ փորձաշրջանի ընթացքում խնդիր տեսնելու դեպքում գործատուն կարող է լուծել աշխատանքային պայմանագիրը՝ փորձաշրջանի արդյունքները չբավարարելու հիմքով»,-ընդգծեց նա:
Ժորա Սարգսյանը ներկայացրեց նաև օրենքով սահմանված աշխատաժամանակի տևողությունը: Նրա խոսքով՝ լրիվ դրույքով աշխատանքի դեպքում անձն աշխատում է 8 ժամ՝ շաբաթական 40 ժամ տարբերակով: Իսկ եթե աշխատանքը ոչ լրիվ դրույքով է, աշխատում են մինչև ութ ժամ. «Չնայած կան որոշակի դեպքեր, երբ կառավարության համապատասխան որոշմամբ, (խոսքը 201 N որոշման և մի քանի այլ որոշումերի մասին է), մի շարք ոլորտների մասնագետների համար նախատեսված է աշխատաժամանակի այլ տևողություն»,-հավելեց նա: Ժորա Սարգսյանի խոսքով՝ լրիվ աշխատունակությունը օրենսգրքով սահմանվում է տասնվեց տարեկանից: Բայց օրենքը հնարավորություն է տալիս որոշակի ոլորտներում աշխատանքի ներգրավել մինչև 14 տարեկան ցանկացած անձի. «Խոսքը թատերական, ստեղծագործական, աշխատանքերի մասին է: Այստեղ խիստ կարգավորում կա այն մասով, որ անպայման պետք է լինի ծնողի, հոգաբարձուի կամ խնամակալի գրավոր համաձայնությունը, որովհետև տվյալ պարագայում պայմանագրի կողմ են հանդիսանում»,-եզրափակեց նա:
Սոնա Մկրտչյան