ԵՐԵՎԱՆ, 14 ՀՈՒՆԻՍԻ, ԱՐՄԵՆՊՐԵՍ: Գերմանիայի Դաշնային Հանրապետությունում Հայաստանի Հանրապետության դեսպան Աշոտ Սմբատյանը հունիսի 14-ին դեսպանությունում հյուրընկալել է Երևանի պետական հումանիտար քոլեջի և Գերմանիայի Հալե քաղաքի Էլիզաբեթ գիմնազիայի միջև աշակերտների փոխանակման ծրագրի մասնակիցներին: 

Ինչպես «Արմենպրես»-ին տեղեկացրին Գերմանիայում Հայաստանի դեսպանատնից, աշակերտներին ուղեկցել են  Երևանի պետական հումանիտար քոլեջի գերմաներենի ուսուցիչ Զուլիետա Միսկարյանը և Էլիզաբեթ գիմնազիայի փոխտնօրեն Աքսել Թումիցինը և ուսուցիչ Դորին Մոդելը: 

Ողջունելով հյուրերին` դեսպանն ընդգծել է նմանատիպ փոխանակման ծրագրերի կարևորությունը հայ-գերմանական գիտակրթական և հումանիտար կապերի ամրապնդման գործում: Աշոտ Սմբատյանն անդրադարձել է հայ-գերմանական հարաբերություններին գիտակրթական, մշակութային և տնտեսական ոլորտներում, պատասխանել աշակերտների բազմաթիվ հարցերին: