«ԴիջիԿոդ» պատանեկան ծրագրավորման մրցույթը բացահայտում է Հայաստանում ճարտարագիտություն ուսումնասիրող դպրոցականներին
ԵՐԵՎԱՆ, 31 ՄԱՅԻՍԻ, ԱՐՄԵՆՊՐԵՍ: Հայաստանում իրականացվող «ԴիջիԿոդ» պատանեկան ծրագրավորման ամենամյա մրցույթը թույլ է տալիս մեծացնել ճարտարագիտական ոլորտում հայ դպրոցականների հետաքրքրվածությունը:
«Արմենպրես»-ի հաղորդմամբ` «ԴիջիԿոդ» մրցույթին մասնակցել են Հայաստանի գրեթե բոլոր մարզերի դպրոցականները` «Արմաթ» ճարտարագիտական լաբորատորիաների 300 դպրոցական: Եզրափակիչ փուլ են անցել նրանցից 54-ը:
Մրցույթը միտված է ճարտարագիտություն ուսումնասիրող դպրոցականներին խաղեր սպառողներից խաղեր ստեղծողներ դարձնելուն:
Լրագրողների հետ զրույցում «Յուքոմ» ընկերության գլխավոր տնօրեն Հայկ Եսայանն ընդգծեց, որ իրենք մշտապես աջակցում են նորարարական ծրագրերին և հանդիսանում են «ԴիջիԿոդ» մրցույթի գլխավոր հովանավորը:
«Մեզ համար շատ կարևոր է և ոգևորիչ, որ այստեղ հավաքվել են նման երիտասարդներ, ովքեր մեր ապագա ճարտարագետներն են: Ընկերությունն այսօր տեսավ, որ այն ներդրումները, որ նախկին 2-3 տարիների ընթացքում իրականացրել ենք «Արմաթ» ճարտարագիտական լաբորատորիաներում, իր արդյունքն արդեն տվել է»,- նշեց Եսայանը և հավելեց, որ մրցույթում հաղթած երեխաները ապագայում ավելի մեծ բարձունքներ կհաղթահարեն:
Դպրոցականներն աշխատել են Կրիա և Մասաչուսեթսի տեխնոլոգիական ինստիտուտի կողմից մշակված Scratch ծրագրավորման լեզուներով: Նրանք կներկայացնեն իրենց խաղերը մասնագիտական ժյուրիի անդամներին ու կմրցեն մինչև 13 և 13 տարեկանից բարձր տարիքային խմբերում «Լավագույն դիզայն», «Լավագույն ալգորիթմական լուծում», «Լավագույն ինտերակտիվ անիմացիա», «Լավագույն ինտերակտիվ անիմացիա և սարքերի ինտեգրում», «Լավագույն խաղ» անվանակարգերում:
Մրցույթի հաղթող երեխաներից մեկը` 12 տարեկան Հռիփսիմե Յուզբաշյանը, զբաղեցրել է 1-ին հորիզոնականը 13 տարեկաններից ցածր տարիքային խմբի «Լավագույն ինտերակտիվ անիմացիա» անվանակարգում:
«Խաղը կոչվում է «Number» (թիվ), և այն ստեղծելու ուղղությամբ աշխատել ենք 8 հոգով: Ստեղծել ենք ուսուցողական խաղ, որը կապված է բանավոր հաշվարկի հետ: Աշխատանքը սկսել ենք մարտ ամսին և դեռ պատրաստվում ենք ավելացնել խաղում այլ ֆունկցիաներ` բազմապատկում և բաժանում»,- նշեց Հռիփսիմե Յուզբաշյանը:
Լավագույն ծրագրերի հեղինակներն արժանացան պատվոգրերի և խրախուսական մրցանակների:
«ԴիջիԿոդն» անցկացվում է 2015 թվականից Ինֆորմացիոն տեխնոլոգիաների ձեռնարկությունների միության (ԻՏՁՄ) կողմից: Գլխավոր հովանավորը «Յուքոմ» ընկերությունն է, իսկ հովանավորը` «Վորլդ Վիժն Հայաստանը», գործընկերն է` Հայաստանի ամերիկյան համալսարանը: