Լիլիթ Մակունցը չի շտապում կադրային փոփոխություններ իրականացնել ՀՀ մշակույթի նախարարությունում
ԵՐԵՎԱՆ, 25 ՄԱՅԻՍԻ, ԱՐՄԵՆՊՐԵՍ: Մշակույթի նախարարությունում որևէ կերպ չեմ շտապում կադրային փոփոխությունների գնալ, գնահատում եմ այն բոլոր աշխատակիցներին, ովքեր իրենց աշխատանքն են իրականացնում պրոֆեսիոնալ կերպով: «Արմենպրես»-ի հաղորդմամբ` այս մասին վարչապետի նախաձեռնած մշակութային գործիչների հետ մայիսի 25-ին հանդիպման մեկնարկին ընդառաջ լրագրողների հետ զրույցում ՀՀ մշակույթի նորանշանակ նախարար Լիլիթ Մակունցը նման կերպ պատասխանեց կադրային փոփոխությունների մասին հարցին:
Լրագրողի հարցին, թե ժամանակակից որ գրողներին է ամենաշատն ընթերցում, Մակունցը պատասխանեց, որ շատ է սիրում Արմեն Օհանյանին: «Թատրոն ևս շատ եմ սիրում: Ցավոք, զբաղվածությունս չի ներում, որ գնամ, բայց մայրիկիս հետ սովորաբար գնում եմ»,-եզրափակեց նա:
Անդրադառնալով «Ոսկե ծիրան» միջազգային կինոփառատոնին` նա նշեց, որ փառատոնի հետ կապված խնդիրներ արդեն չկան: