1000х90.jpg (78 KB)

Արտգործնախարար Մնացականյանը հանդիպեց Կիպրոսի խորհրդարանի նախագահին

Armenpress 19:02, 22 Մայիս, 2018
ԵՐԵՎԱՆ, 22 ՄԱՅԻՍԻ, ԱՐՄԵՆՊՐԵՍ: ԱԳ նախարար Զոհրաբ Մնացականյանը մայիսի 22-ին հանդիպեց պաշտոնական այցելությամբ Երևանում գտնվող Կիպրոսի Ներկայացուցիչների պալատի նախագահ Դեմետրիս Սիլուրիսին:

Ինչպես «Արմենպրես»-ին տեղեկացրին ՀՀ արտգործնախարարության մամուլի, տեղեկատվության և հասարակայնության հետ կապի վարչությունից, ողջունելով հյուրին՝ Հայաստանի արտգործնախարարը նշեց, որ ուրախ է հյուրընկալել եղբայրական Կիպրոսի Ներկայացուցիչների պալատի նախագահին և նրա գլխավորած ներկայացուցչական պատվիրակությանը: Նախարար Մնացականյանի խոսքերով՝ տարբեր երկրներում իր դիվանագիտական աշխատանքի ընթացքում մշտապես ջերմ ու արդյունավետ համագործակցային հարաբերություններ է ունեցել Կիպրոսի գործընկերների հետ, ինչը գալիս է երկու երկրների ավանդական բարեկամությունից։

Շնորհակալություն հայտնելով ջերմ ընդունելության համար՝ Կիպրոսի խորհրդարանի նախագահը նշեց, որ այցը Հայաստան շատ հագեցած է և լավ առիթ է քննարկելու երկու եղբայրական երկրների միջև հարաբերություններն առավել ընդլայնելու և զարգացնելու հեռանկարները:

Հանդիպման ընթացքում զրուցակիցներն անդրադարձան երկկողմ օրակարգի մի շարք հարցերի՝ նշելով, որ երկու երկրներին միավորում են բարեկամության և համերաշխության վրա հիմնված ամուր պատմական կապերը:

Զոհրաբ Մնացականյանը և Դեմետրիս Սիլուրիսը գոհունակությամբ արձանագրեցին, որ Հայաստանը և Կիպրոսը հաստատել են ամուր միջպետական կապեր՝ կարևորելով երկկողմ պատրաստակամությունը էլ ավելի խորացնելու գործակցությունը փոխադարձ հետաքրքրություն ներկայացնող բոլոր բնագավառներում:

Հայաստանի արտգործնախարարը և Կիպրոսի խորհրդարանի ղեկավարը գոհունակությամբ արձանագրեցին, որ միջազգային հարթակներում երկու երկրների միջև հաստատվել է արդյունավետ փոխգործակցություն, և քննարկեցին տարբեր ոլորտներում համագործակցության առավել խթանման հարցեր։

Զոհրաբ Մնացականյանը և Դեմետրիս Սիլուրիսը հանգամանալից մտքեր փոխանակեցին տարածաշրջանային և միջազգային հրատապ խնդիրների շուրջ։

ԱԳ նախարարը Կիպրոսի խորհրդարանական պատվիրակությանը ներկայացրեց ԵԱՀԿ Մինսկի խմբի համանախագահների ձևաչափում ղարաբաղյան հիմնախնդրի խաղաղ կարգավորմանն ուղղված ջանքերը:



Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ contact@armenpress.am