ՀՀ վճռաբեկ դատարանի քրեական պալատի նախագահը հանդիպել է բողոքող ակտիվիստների հետ
ԵՐԵՎԱՆ, 18 ՄԱՅԻՍԻ, ԱՐՄԵՆՊՐԵՍ: ՀՀ վճռաբեկ դատարանի քրեական պալատի նախագահ Սերժիկ Ավետիսյանը մայիսի 18-ին հանդիպեց բողոքի ակցիա կազմակերպած քաղաքացիների հետ: Ինչպես տեղեկացնում է «Արմենպրես»-ը, ակտիվիստները պահանջում են հնարավորինս սեղմ ժամկետում ընդունել վարույթ ԼՂՀ պաշտպանության նախկին նախարար Սամվել Բաբայանի գործով բողոքը:
«Սամվել Բաբայանի գործը մեկ ամիս առաջ ներկայացվել է Վճռաբեկ դատարան, որպեսզի նրա մեղադրանքը բեկանվի և արդարացում լինի: Մենք գիտենք, որ սահմանված է եռամսյա ժամկետ, որի ընթացքում Վճռաբեկ դատարանը կարող է ընդունել հայցը վարույթ, բայց կարող է նաև չընդունել: Մեր պահանջը այն է, որ հնարավորինս սեղմ ժամկետով ընդունվի վարույթ և արդարացում լինի», -նշեց վերլուծաբան Անդրանիկ Թևանյանը:
Վճռաբեկ դատարանի քրեական պալատի նախագահ Սերժիկ Ավետիսյանը նշեց, որ հստակ ժամկետ չեն կարող սահմանել, որովհետև դա կախված է գործի բարդությունից: Նրա խոսքով` սույն գործով բողոքը մուտքագրվել է սույն թվականի ապրիլի 17-ին և եռամսյա ժամկետում որոշում պետք է կայացվի:
«Ցանկացած գործով պատասխանը լինելու է գործող օրենսդրության շրջանակներում: Քանի դեռ մենք որոշում չենք կայացրել, ուրեմն մենք պատրաստ չենք հանգել համապատասխան հետևության: Անլուրջ է լինելու, եթե որևէ պաշտոնյա ասի, որ այս կամ բողոքի վերաբերյալ պատասխան կտա 5 օրում, 10 կամ 20 օրում»,- ասաց Ավետիսյանը և հավելեց, որ ճնշում իր վրա որևէ մեկը չի գործադրել և չի կարող գործադրել:
Նա նաև ներկայացրեց նախորդ տարվա վիճակագրությունը դատապարտյալների արդարացումների հետ կապված: «2017 թվականին 180 անձի նկատմամբ կայացվել են արդարացման դատական ակտեր, ինչը կազմում է շուրջ 5 տոկոս դատապարտված անձանց: 10 տարի առաջ Հայաստանում արդարացված անձանց թիվը եղել է 25` 0.7 տոկոս»,- ընդգծեց նա:
Անդրանիկ Թևանյանը նշեց, որ յուրաքանչյուր աշխատանքային օր գալու են և տեղեկանան, թե գործը ինչ փուլում է և հաջորդ ակցիան լինելու է մայիսի 21-ին:
Սամվել Բաբայանը մեղավոր էր ճանաչվել ՀՀ քրեական օրենսգրքի 38-235-րդ հոդվածի 2-րդ մասով ու 190-րդ հոդվածի 1-ին մասով և դատապարտվել 6 տարվա ազատազրկման:
Նրան մեղադրանք էր առաջադրվել այն բանի համար, որ նա դրդել է մի խումբ անձանց` նախնական համաձայնությամբ ապօրինի կերպով ռազմամթերք հանդիսացող «Իգլա» տեսակի դյուրակիր զենիթահրթիռային համալիր ձեռք բերելուն, փոխադրելուն և պահելուն, ինչպես նաև փոխարկման արդյունքում ձեռք է բերել հանցավոր ճանապարհով ստացված գույք:
Բաբայանի գործով փաստաբան Ավետիս Քալաշյանը ապրիլի 26-ին դիմել է ՀՀ վճռաբեկ դատարան: Փաստաբանը բողոքարկում է Երևանի ընդհանուր իրավասության Կենտրոն և Նորք-Մարաշ շրջանների նստավայրի դատարանի դատավճիռը Սամվել Բաբայանին 6 տարվա ազատազրկման դատապարտելու մասին, որը ՀՀ վերաքննիչ դատարանը թողել է անփոփոխ: