ՀԵՀ 10 մարզային կենտրոններ ներկայացրել են 2017թ. տարեկան հաշվետվությունը
ԵՐԵՎԱՆ, 17 ՄԱՐՏԻ, ԱՐՄԵՆՊՐԵՍ: Հայաստանի երիտասարդական հիմնադրամի տասը մարզային կենտրոնները Մարտի 17-ին հանդես են եկել 2017թ. տարեկան հաշվետվությամբ։ Ինչպես «Արմենպրես»-ին տեղեկացրին Հայաստանի երիտասարդական հիմնադրամից, յուրաքանչյուր մարզային կենտրոնի համակարգող ներկայացրել է անցած տարում իրականացված ծրագրերը, կամավորների հետ տարվող աշխատանքները, համագործակցությունը տեղական կառույցների հետ։
2017թ. ընթացքում ՀԵՀ 10 մարզային երիտասարդական կենտրոնների կողմից իրականացվել է մոտ 370 ծրագիր։ Հայաստանի երիտասարդական հիմնադրամի հոգաբարձուների խորհրդի համակարգող Կարեն Ավագյանը, կարևորելով ու գնահատելով ՀԵՀ մարզային կենտրոնների կատարած աշխատանքը, արել է մի շարք նկատառումներ։
Նշելով, որ հիմնադրամի մարզային կենտրոններն ունեն ֆինանսական, մարդկային, տեխնիկական, գույքային մեծ ռեսուրսներ, նա շեշտել է, որ պետք է այդ ռեսուրսները ճիշտ համադրել ու հասնել առավելագույն արդյունքի։ Կարեն Ավագյանը նկատել է, որ մարզային կենտրոնների ներկայացուցիչները պետք է էլ ավելի մեծ ուշադրություն դարձնեն իրականացվող ծրագրերի բովանդակության, կամավորների հետ տարվող աշխատանքների վրա։
ՀԵՀ ծրագրերի իրականացման ծառայության ղեկավար Արուսյակ Պողոսյանը նշել է, որ չպետք է բավարարվել ձեռք բերածով, ամեն ինչ պետք է անել հիմնադրամի մարզային կենտրոնների աշխատանքների շարունակական կատարելագործման ուղղությամբ։ Այդ համատեքստում նա նաև առաջարկել է ավելի սերտացնել համագործակցությունը երիտասարդական, ուսանողական տարբեր կառույցների հետ, վերջիններիս հետ պարբերաբար իրականացնել փորձի փոխանակում, ինչն արդյունավետ կլինի երկու կողմերի համար էլ։
ՀԵՀ գործադիր տնօրեն Ալեքսանդր Տեր-Հովակիմյանը մարզային կենտրոնների աշխատակիցներին տվել է մի շարք հանձնարարականներ։ Նա շեշտադրել է ՀԵՀ մարզային երիտասարդական կենտրոնների կամավորների հմտությունների, կարողությունների զարգացումը, ինչի ուղղությամբ պետք է իրականացվեն համապատասխան ծրագրեր։