«Ուրարտուին» հեշտ հանդիպում չի սպասում «Արցախի» դեմ խաղում. Արեգ Վաթյան
ԵՐԵՎԱՆ, 5 ՄԱՐՏԻ, ԱՐՄԵՆՊՐԵՍ: «Արցախ» բասկետբոլային ակումբը պատրաստ է լուրջ դիմակայություն ցույց տալ Հայաստանի կանոնավոր առաջնության կիսաեզրափակիչում «Ուրարտուի» դեմ խաղում:
«Մեր սպասելիքները չարդարացան այն տեսանկյունից, որ «Շիրակ» բասկետբոլային ակումբն արժանի դիմակայություն ցույց չտվեց և չուժեղացավ այնպես, ինչպես մենք էինք սպասում: Իսկ մենք երեք նոր ձեռքբերում ունեցանք: ¼ եզրափակիչի երկու խաղում էլ մեծ էր տարբերությունը երկու թիմերի միջև»-«Արմենպրես»-ի հետ զրույցում ասաց «Արցախ» բասկետբոլային ակումբի սպորտային տնօրեն Արեգ Վաթյանը:
Խոսելով առաջիկա մրցակցի` «Ուրարտու» ակումբի մասին, Վաթյանը, մասնավորապես, փաստեց. «Ուրարտուին» հեշտ հանդիպում չի սպասում «Արցախի» դեմ խաղում: Չեմ ուզում ամպագոռգոռ խոսքեր ասել, սակայն նրան մեծ անակնկալներ են սպասում»:
«Արցախ» բասկետբոլային ակումբը նոր համալրում չի ունենա:
Հայաստանի կանոնավոր առաջնության կիսաեզրափակիչները նախնական տեղեկությունների համաձայն կկայանան մարտի 17-ին: