Բուլղարիայի Հանրապետության առաջին տիկինը այցելեց Սերգեյ Փարաջանովի թանգարան
ԵՐԵՎԱՆ, 12 ՓԵՏՐՎԱՐԻ, ԱՐՄԵՆՊՐԵՍ։ Բուլղարիայի Հանրապետության առաջին տիկին Դեսիսլավա Ռադևան Հայաստանի Հանրապետության առաջին տիկին Ռիտա Սարգսյանի ուղեկցությամբ այցելեց կինոռեժիսոր, սցենարիստ Սերգեյ Փարաջանովի թանգարան։
«Արմենպրես»-ի հաղորդմամբ՝ թանգարանի տնօրեն Զավեն Սարգսյանը դիմավորեց առաջին տիկիններին և ներկայացրեց թանգարանում առկա ցուցանմուշները։
Մինչ հյուրերին կինոռեժիսորի գործերին ծանոթացնելը Զավեն Սարգսյանը նշեց, որ իրենք 2008 թվականին Բուլղարիայի մայրաքաղաք Սոֆիայում ցուցահանդես են ունեցել, որի բացմանը ներկա է եղել նաև ՀՀ նախագահ Սերժ Սարգսյանը։
Բուլղարիայի Հանրապետության առաջին տիկինը շրջեց թանգարանի սրահներով և ծանոթացավ հանճարեղ արվեստագետի աշխատանքներին։
Դեսիսլավա Ռադևան հիացած էր Սերգեյ Փարաջանովի ստեղծագործություններով։
Կինոռեժիսոր, սցենարիստ, նկարիչ Սերգեյ Փարաջանովը ծնվել է 1924 թվականի հունվարի 9-ին Թբիլիսիում։ Նա բազմաթիվ հանրահայտ ֆիլմերի հեղինակ է, ինչպիսիք են՝ «Նռան գույնը», «Մոռացված նախնիների ստվերները», «Սուրամի ամրոցի լեգենդը» և այլն։
Վախճանվել է 1990 թվականի հուլիսի 21-ին։
Փետրվարի 12-ին ՀՀ նախագահ Սերժ Սարգսյանի հրավերով պետական այցով տիկնոջ հետ Հայաստանի Հանրապետություն է ժամանել Բուլղարիայի Հանրապետության նախագահ Ռումեն Ռադևը։