Հայաստանի բնության պետական թանգարանում կբացվի էկոտուրիզմի աջակցման տեղեկատվական կենտրոն
ԵՐԵՎԱՆ, 7 ՓԵՏՐՎԱՐԻ, ԱՐՄԵՆՊՐԵՍ: Հայաստանի բնության պետական թանգարանում կբացվի էկոտուրիզմի աջակցման տեղեկատվական կենտրոն:
Այս մասին «Արմենպրես»-ի մամուլի սրահում հրավիրված ասուլիսում նշեց ՀՀ բնապահպանության նախարարի տեղակալ Խաչիկ Հակոբյանը:
«Այն հնարավորություն կտա զբոսաշրջիկներին տեղում, մեկ վայրում ծանոթանալ ամբողջ էկոտուրիստական ներուժին, երթուղիներին: Ի դեպ, հատուկ պահպանվող տարածքները թանգարանում ներկայացված են նաև համապատասխան ցուցանմուշներով»,-ասաց Խաչիկ Հակոբյանը:
Նրա տեղեկացմամբ, լինելու է վճարման առցանց համակարգ, որը տուրիստների համար ավելի է հեշտացնելու ծառայություններից օգտվելու ընթացակարգը: Նրանց պետք չի լինի համապատասխան գրասենյակներ գնալ վճարումներ կատարելու համար, այդ ամենը կարվի մեկ տեղում: Խաչիկ Հակոբյանը նշեց, որ այս քաղաքականությունը հնարավորություն կտա տեղերում խուսափել կոռուպցիոն ռիսկերից:
Աշխատանքներ են տարվում նաև միջազգային տարբեր արշավային, զբոսաշրջային կայքերում էկոտուրիզիմի համապատասխան երթուղիները ներկայացնելու առումով: Թարմացվում է Վիկիպեդիայի տեղեկատվական բազան բնության հատուկ պահպանվող տարածքների վերաբերյալ: