Դանիայի արդյունաբերության, բիզնեսի ու ֆինանսական հարցերի նախարարը Հայաստան այցելելու պատրաստակամություն է հայտնել
ԵՐԵՎԱՆ, 19 ՀՈՒՆՎԱՐԻ, ԱՐՄԵՆՊՐԵՍ: Դանիայի Թագավորությունում Հայաստանի Հանրապետության դեսպան Ալեքսանդր Արզումանյանը հունվարի 19-ին հանդիպել է Դանիայի արդյունաբերության, բիզնեսի ու ֆինանսական հարցերի նախարար Բրայան Միկելսենի հետ: Այս մասին «Արմենպրես»-ին տեղեկացրին ՀՀ արտաքին գործերի նախարարության մամուլի, տեղեկատվության և հասարակայնության հետ կապի վարչությունից՝ հավելելով. «Հանդիպման սկզբում նախարար Միկելսենը նշեց, որ ողջունելի է Հայաստանի հետաքրքրվածությունը հայ-դանիական առևտրատնտեսական կապերի զարգացման համար ուղիներ փնտրելու և հարաբերությունները նոր մակարդակի բարձրացնելու գործում: Նա նաև նշեց, որ ՀՀ-ԵՄ Համապարփակ և ընդլայնված գործընկերության համաձայնագիրը ևս կնպաստի առկա ներուժի արդյունավետ օգտագործմանը: Դեսպան Արզումանյանը խոսեց Հայաստանի այն ոլորտների մասին, որտեղ համագործակցությունը և դանիական ներդրումները կարող են շահեկան լինել` մասնավորապես, ներկայացնելով տեղեկատվական տեխնոլոգիաների, էներգետիկայի ոլորտները, Մեղրիի ազատ տնտեսական գոտում ներդրումային հնարավորությունները: Այդ համատեքստում կարևորվեց փոխայցելությունների իրականացումը, ինչպես նաև փոխադարձ հետաքրքրություն ներկայացնող ոլորտների վերաբերյալ սեմինարների և բիզնես ֆորումների կազմակերպումը: Նախարար Բրայան Միկելսենը համաձայնեց, որ այցերն ու տեղում ոլորտների պատասխանատուների հետ հանդիպումներն ու քննարկումները կարող են նպաստել արդյունավետ փոխգործակցությանը, և առաջիկայում Հայաստան այցելության հետաքրքրություն ու պատրաստակամություն հայտնեց` կոնկրետ ոլորտների ներկայացուցիչներին հանդիպելու և ներդրումային հնարավորություններին ծանոթանալու նպատակով: Կողմերը պայմանավորվեցին աշխատանք իրականացնել այդ ուղղությամբ»: