1000х90.jpg (78 KB)

Գերմանիան տեղյակ է այդ երկրում հաստատված հայերի և ալևիների դեմ Թուրքիայում ծրագրվող հարձակումների վերաբերյալ

Armenpress 12:05, 22 Դեկտեմբեր, 2017

ԵՐԵՎԱՆ, 22 ԴԵԿՏԵՄԲԵՐԻ, ԱՐՄԵՆՊՐԵՍ: Գերմանիայի իրավապահ մարմինները հայտարարել են, որ տեղյակ են Թուրքիայի մեջլիսի հայ պատգամավոր Գարո Փայլանի հայտարարության մասին, համաձայն որի Եվրոպայի մի շարք երկրներում, մասնավորապես՝ Գերմանիայում, մահափորձեր են նախապատրաստվում Թուրքիայից այդտեղ հաստատված անձանց, մասնավորապես՝ հայերի և ալևիների նկատմամբ: Ինչպես հաղորդում է «Արմենպրես»-ը, իրավապահ մարմինները գերմանական Deutsche Welle-ին հայտնել են, որ ուսումնասիրում են տվյալները հնարավոր հարձակումների վերաբերյալ:

«Տեղյակ ենք վերոնշյալ վտանգից, անհրաժեշտ աչալրջությամբ ուսումնասիրում ենք իրադրությունը: Սակայն իրավիճակի և պաշտպանական միջոցների ձեռնարկման մասին այլ մանրամասներ չենք կարող տրամադրել»,- ասվում է իրավապահ մարմինների հայտարարության մեջ:

Գարո Փայլանը գերմանական լրատվամիջոցի հետ զրույցում հայտնել է, որ մահափորձերի մասին տեղեկություն ստացել է արտերկրյա հետախուզական մարմիններից, սակայն չի կարող հստակ նշել դրանց աղբյուրը: «Միայն կարող եմ ասել, որ դրանք շատ վստահելի տեղեկություններ են»,- ասել է նա: Պատգամավորը նշել է, որ Եվրոպայում և գլխավորապես Գերմանիայում այս տեղեկությունից հետո որոշ անձինք պաշտպանության տակ են առնվել:

Փայլանը հայտնել է նաև, որ Թուրքիայի կառավարության ներկայացուցիչները, ում հետ հանդիպել և խոսել է իր ունեցած տվյալների վերաբերյալ, խոստացել են անհրաժեշտ միջոցներ ձեռնարկել:

Թուրքիայում հետապնդումների հետևանքով Գերմանիայում հաստատված հայ լրագրող Հայկո Բաղդաթը Deutsche Welle-ի հետ զրույցում հայտնել է, որ ինքը ևս տեղյակ է Փայլանի հայտնած հետախուզական տվյալներից, որոնք իսկապես լուրջ վտանգ են իրենցից ներկայացնում: Նա տեղեկացրել է, որ խնդրի առնչությամբ համապատասխան մարմինների հետ համագործակցության մեջ է: «Թող Թուրքիան անի անհրաժեշտ ամեն բան իր քաղաքացիներին պաշտպանելու համար»,- ասել է նա:

Խնդրի մասին խոսել է նաև Գերմանիայի ալևիական միությունների համադաշնության ղեկավար Յըլմազ Քահրամանը, ով նշել է, թե իրենք վաղուց են տեղեկացված հնարավոր սպառնալիքի վերաբերյալ: Նա ընդգծել է, որ գերմանաբնակ ալիևիների թուրքական ծայրահեղական կազմակերպությունների թիրախում են:

Թուրքիայի Ազգային մեծ ժողովի հայ պատգամավոր Գարո Փայլանը մեջլիսում կազմակերպված մամուլի ասուլիսի ժամանակ դեկտեմբերի 20-ին հայտարարել է, որ հետախուզական տվյալներ ունի այն մասին, թե Եվրոպայի հայկական համայնքի ներկայացուցիչների դեմ մահափորձ է կազմակերպվում: «Հետախուզական տվյալներ ունեմ այն մասին, որ Եվրոպայում բնակվող Թուրքիայի քաղաքացի ալևիների և հայկական համայնքների ներկայացուցիչների, ինչպես նաև «Արդարություն և զարգացում» կուսակցության իշխանության օրոք երկիրը ստիպված լքած լրագրողների, գրողների, ակադեմիկոսների դեմ որոշակի խմբեր գործողություն են նախապատրաստում, որը մեծ աղմուկ պետք է բարձրացնի»,- ասել է Փայլանը:



Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ contact@armenpress.am