1000х90.jpg (78 KB)

Բժշկական համալսարանում բացվել է առողջապահության ոլորտի գրականությամբ հագեցած ՄԱԿ-ի անկյուն

Armenpress 19:52, 22 Նոյեմբեր, 2017

ԵՐԵՎԱՆ, 22 ՆՈՅԵՄԲԵՐԻ, ԱՐՄԵՆՊՐԵՍ: ՄԱԿ-ի հայաստանյան գրասենյակի նախաձեռնությամբ Երևանի Մխիթար Հերացու անվան պետական բժշկական համալսարանում (ԵՊԲՀ) տեղի է ունեցել Հայաստանում 18-րդ ՄԱԿ-ի անկյան բացման արարողությունը: Այս մասին «Արմենպրես»-ին տեղեկացրին ՄԱԿ-ի հանրային տեղեկտվության վարչությունից՝ հավելելով. «Ներկա էին ԵՊԲՀ ռեկտոր Արմեն Մուրադյանը, Առողջապահության համաշխարհային կազմակերպության (ԱՀԿ) ներկայացուցիչ Եգոր Զայցևը, ՄԱՁԻԱՀ Ազգային ծրագրի ղեկավար Լենա Նանուշյանը, ՄԱԿ-ի հանրային տեղեկատվության վարչության (ՀՏՎ) ղեկավար Արմինե Հալաջյանը, ինչպես նաև ԲՈՒՀ-ի գիտական խորհրդի կազմը։

Ողջունելով հյուրերին` ռեկտոր Ա. Մուրադյանն ասաց. «Երևանի Մ.Հերացու անվան պետական բժշկական համալսարանում ՄԱԿ-ի անկյան բացումը ծառայելու է երիտասարդության կարողությունների և գիտելիքների հզորացմանը` ՄԱԿ-ի գլոբալ օրակարգի իրագործման ուղղությամբ նրանց ներգրավվածության հիմքերի ձևավորման համար ընդհանրապես և առողջապահական խնդիրների վերաբերյալ՝ մասնավորապես:» 

ԱՀԿ ներկայացուցիչ Ե. Զայցևը իր խոսքում ասաց, որ սա շատ կարևոր նախաձեռնություն է: «Բնականաբար, շատ դժվար է որպես մասնագետ զարգանալ առանց ապացուցողական բշժկության և առողջապահության  մասին տեղեկություն ստանալու հնարավորության: Նույնքան կարևոր է ստացած տեղեկությունը կիրառել պրակտիկայում»։

«ՄԱԿ-ի մասնագիտացված գործակալությունների հետ համագործակցությունը, թույլ կտա ապագա բժիշկներին ստացած գիտելիքների շնորհիվ իրենց ներդրումը ունենալ մինչև 2030 թվականը Հայաստանում  ՁԻԱՀ-ի համաճարակի վերջ դնելու գործընթացում»,- իր խոսքում ասաց ՄԱՁԻԱՀ-ի Ազգային ծրագրի ղեկավար Լ.Նանուշյանը։

Անկյունը, որի պահոցում առկա է ավելի քան 300 միավոր գրականություն (գրքեր, պաստառներ, գրքույկներ և այլ հրատարակություններ)` թողարկված ՄԱԿ-ի կենտրոնական գրասենյակների  և ՄԱԿ-ի գործակալությունների, հիմնադրամների և ծրագրերի հայաստանյան գրասենյակների կողմից, (ԱՀԿ, ՄԱԿ-ի Բնակչության հիմնադրամ, ՄԱԿ-ի Մանկական հիմնադրամ, ՄԱԿ-ի ՄԻԱՎ/ՁԻԱՀ-ի Միացյալ ծրագիր, ՄԱԿ-ի հանրային տեղեկատվության վարչություն) կծառայի նաև ՄԱԿ-ի հետ կապված կրթական, իրազեկման բարձրացման ու այլ միջոցառումների կազմակերպման նպատակին, ինչպես նաև համատեղ նշելու առողջության հետ կապված ՄԱԿ-ի հիշարժան օրերը։ ՄԱԿ-ի անկյունը նաև լավ հարթակ է այստեղ կազմակերպել հանդիպումներ ՄԱԿ-ի աշխատակիցների ու փորձագետների հետ,  քննարկումներ ծավալել ընդհանուր թեմաների շուրջ, շնորհանդեսներ ու աշխատաժողովներ ունենալ։

ՄԱԿ-ի անկյունների բացումը ընդհանուր առմամբ նպատակ ունի բարձրացնելու հանրային իրազեկվածության մակարդակը՝ հետաքրքրություն խթանելով ՄԱԿ-ի արժեքների, համաշխարհային օրակարգի և քաղաքականությունների վերաբերյալ: ՄԱԿ-ի անկյունների մասին ամբողջական տեղեկատվություն կարող եք գտնել սույն հղումով՝ https://www.un.am/hy/p/un-corners»։



Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ contact@armenpress.am