ԵՐԵՎԱՆ, 14 ՆՈՅԵՄԲԵՐԻ, ԱՐՄԵՆՊՐԵՍ: ՀՀ ոստիկանության պետի տեղակալ, ոստիկանության գեներալ-մայոր Սամվել Հովհաննիսյանը նոյեմբերի 14-ին ընդունել է Հայաստանում Միավորված ազգերի կազմակերպության անվտանգության հարցերով պատասխանատու Ինոք Փեննի-Լայի գլխավորած պատվիրակությանը: Ինչպես «Արմենպրես»-ը տեղեկացավ ՀՀ ոստիկանության պաշտոնական կայքից, շնորհավորելով Ինոք Փեննի-Լային Հայաստանում պաշտոնավարելու կապակցությամբ՝ Սամվել Հովհաննիսյանը հույս է հայտնել, որ կազմակերպության հետ հետագա համագործակցությունը ևս կլինի արդյունավետ ու գործընկերային: Շնորհակալություն հայտնելով ջերմ ընդունելության համար՝ Փեննի-Լայը իր հերթին պատրաստակամություն է հայտնել խորացնել փոխգործակցությունը անվտանգության հարցերում:  Հանդիպմանը կողմերը քննարկեցին փոխադարձ հետաքրքրություն ներկայացնող մի շարք հարցեր: