Դեբորա Գրիզերը դրական է գնահատում կոռուպցիայի դեմ ՀՀ կառավարության քայլերը
ԵՐԵՎԱՆ, 12 ՀՈԿՏԵՄԲԵՐԻ, ԱՐՄԵՆՊՐԵՍ: ԱՄՆ միջազգային զարգացման գործակալությունը ընթացիկ տարվա համար ստանալու է 17 մլն դոլարի ֆինանսավորում Հայաստանում ծրագրեր իրականացնելու նպատակով: «Արմենպրես»-ի հաղորդմամբ՝ Հայաստանի եւ ԱՄՆ միջազգային գործակալության 25-ամյակին նվիրված միջոցառման շրջանակում լրագրողների հետ զրույցում այս մասին տեղեկացրեց գործակալության հայաստանյան առաքելության տնօրեն Դեբորա Գրիզերը՝ հավելելով, որ միջոցներն ուղղվելու են զբոսաշրջության զարգացմանը, էներգետիկ ոլորտին, ժողովրդավարական բլոկին առնչվող ծրագրերին:
Լրագրողների հարցին, թե արդյոք Հայաստանին այդքան օժանդակություն ցուցաբերելով հանդերձ նա չունի մտավախություն, որ դրանք չեն ծառայելու իրենց նպատակին, Դեբորա Գրիզերը պատասխանեց, որ կոռուպցիայի դեմ պայքարի ուղղությամբ Հայաստանը կատարում է քայլեր, որոնք թեպետ փոքր, սակայն ճիշտ ուղղությամբ են:
Գործակալության հայաստանյան առաքելության տնօրենը նաեւ տեղեկացրեց, որ մոտակա ժամանակահատվածում նա եւ ՀՀ-ում ԱՄՆ դեսպան Ռիչարդ Միլսը նախատեսում են հանդիպում ունենալ ՀՀ վարչապետ Կարեն Կարապետյանի հետ՝ քննարկելու ՀՀ կառավարության հակակոռուպցիոն գործողությունները:
«Մենք՝ որպես միջազգային զարգացման գործակալություն, չենք ցանկանում առաջատար դիրք գրավել այդ աշխատանքների կատարման հարցում, այլ ցանկանում ենք օժանդակել ՀՀ կառավարության նախաձեռնություններին»,-եզրափակեց Դեբորա Գրիզերը՝ հավելելով, որ այժմ դեռեւս քննարկման փուլում է այն հարցը, թե ինչ նպատակների կարող են ուղղել գործակալության կողմից հատկացվելիք 800 հազար դոլարը: