Փրինսի չհրատարակված ստեղծագործությունները տեղափոխել են Կալիֆոռնիա. AP
ԵՐԵՎԱՆ, 12 ՀՈԿՏԵՄԲԵՐԻ, ԱՐՄԵՆՊՐԵՍ: Անցյալ տարի Մինեսոթայի նահանգում վախճանված Փրինսի չհրատարակված ստեղծագործությունների հեղինակային օրինակները հանել են նրա Paisley Park կալվածքի չհրկիզվող պահարանից եւ տեղափոխել Կալիֆոռնիայի նահանգ: Կատարողի ազգականներն ու ժառանգները իրազեկված չեն եղել այդ մասին: Ինչպես տեղեկացնում Է «Արմենպրես»-ը, հոկտեմբերի 1-ին այդ մասին հայտնել Է Associated Press (AP) լրատվական գործակալությունը՝ վկայակոչելով երգչի խորթ քույրերին՝ Շերոնին եւ Նորինին:
Նրանք պահանջել են Փրինսի ստեղծագործական ժառանգության այդ արժեքավոր մասը վերադարձնել նրա կալվածք: «Մենք ցանկանում են, որ երաժշտական ստեղծագործությունների օրինակները վերադարձնեն Paisley Park, դրանք պետք Է գտնվեն հենց այնտեղ»,-AP-ին հայտարարել Է Շերոն Նելսոնը: «Ես այն զգացողությունն ունեմ, ասես Փրինսը երկրորդ անգամ մահացավ»,-հավելել Է նա: Նորին Նելսոնը տեղի ունեցածը որակել Է «աննախադեպ եւ անազնիվ»: AP-ի տվյալներով՝ դատարանը երգչի ողջ շարժական եւ անշարժ ունեցվածքը գնահատել Է շուրջ 200 մլն դոլար գումար: Կալվածքի չհրկիզվող պահարանում պահվող ձայնագրությունները համարվում են ժառանգության ամենաարժեքավոր բաղադրիչները:
Comerica Bank & Trust ընկերությունը տնօրինում Է Փրինսի ունեցվածքը եւ գործակալությանը հաստատել Է, որ ինքն Է որոշում ընդունել հեղինակային օրինակները հանձնել Iron Mountain ֆիրմային, որն զբաղվում Է հատկապես արժեքավոր իրերի պահպանմամբ:
Մայիսին Մինեսոտայի դատարանը հայտարարել Է Փրինսի միակ ժառանգներին: Նրանք են՝ երգչի հարազատ քույրը՝ Թայքի Նելսոնը, ինչպես նաեւ նրա խորթ եղբայրներն ու քույրերը՝ Նորինը, Շերոնը, Ջոն Նելսոնը, Օմար Ջեքսոնը եւ Ալֆրեդ Բեյքերը, հաղորդել Է ՏԱՍՍ գործակալությունը: