ԵՐԵՎԱՆ, 13 ՍԵՊՏԵՄԲԵՐԻ, ԱՐՄԵՆՊՐԵՍ: 2016 թվականի սեպտեմբերի 15-ից մինչև 2017-ի սեպտեմբերի 7-ը ՀՀ կառավարության կողմից հավանության է արժանացել և ՀՀ Ազգային Ժողով ներկայացվել 160 օրենքի նախագիծ:

«Արմենպրես»-ի փոխանցմամբ, այդ մասին նշված է ՀՀ կառավարության ներկայացրած 2016 թվականի սեպտեմբերի 1-ից 2017 թվականի օգոստոսի 30-ն ընկած ժամանակահատվածում ընտրված ոլորտներում արձանագրված արդյունքների վերաբերյալ հակիրճ հաշվետվության մեջ: Նախագծերի 39 տոկոսը վերաբերում է տնտեսական ոլորտին, 10 տոկոսը՝ սոցիալական, 41 տոկոսը՝ պետաիրավական, 10 տոկոսը՝ տարածքային, բնապահպանական, քաղաքաշինական և էներգետիկ ոլորտներին: Նույն ժամանակահատվածում կառավարության կողմից ընդունվել է 1351 կառավարության որոշում: Դրանցից 58 տոկոսը վերաբերել է տնտեսական և ֆինանսական ոլորտին, 13 տոկոսը՝ սոցիալական, 19 տոկոսը՝ պետաիրավական, 10 տոկոսը՝ տարածքային, բնապահպանական, քաղաքաշինական և էներգետիկ ոլորտներին: