ԱՄԷ-ում կայացել են ՀՀ անկախության 24-րդ տարեդարձին նվիրված միջոցառումներ
ԵՐԵՎԱՆ, 24 ՍԵՊՏԵՄԲԵՐԻ, ԱՐՄԵՆՊՐԵՍ: ՀՀ անկախության 24-րդ տարեդարձի առթիվ Արաբական Միացյալ Էմիրությունների Շարժա քաղաքի Սուրբ Գրիգոր Լուսավորիչ եկեղեցում սեպտեմբերի 18-ին տեղի է ունեցել Սուրբ պատարագ: Ինչպես «Արմենպրես»-ին տեղեկացրին ՀՀ արտաքին գործերի նախարարության մամուլի, տեղեկատվության եւ հասարակայնության հետ կապի վարչությունից, սեպտեմբերի 23-ին Արաբական Միացյալ Էմիրություններում ՀՀ դեսպանության հանդիսասրահում տեղի է ունեցել պաշտոնական ընդունելություն:
Հայաստանի Հանրապետության պետական օրհներգին հաջորդել է ԱՄԷ և Կատարի թեմի կաթողիկոսական փոխանորդ, Հոգեշնորհ Տեր Մեսրոպ վարդապետ Սարգսյանի մաղթանքը և սրտի խոսքը:
ԱՄԷ-ում ՀՀ դեսպան Գեղամ Ղարիբջանյանն իր ելույթում անդրադարձել է Հայաստանի Հանրապետության արտաքին ու ներքին քաղաքականության հարցերին, ապա ընթերցվել է ՀՀ Նախագահ Սերժ Սարգսյանի շնորհավորական ուղերձն Անկախության տարեդարձի առիթով:
Երեկոյի գեղարվեստական բաժնից հետո տեղի է ունեցել հյուրասիրություն: