Իրանի միջուկային օբյեկտներին ռազմական հարվածը դրանք ամբողջությամբ չի ոչնչացնի. Պենտագոն
ԵՐԵՎԱՆ, 2 ՀՈՒԼԻՍԻ, ԱՐՄԵՆՊՐԵՍ: Իրանի միջուկային ծրագրի օբյեկտների դեմ ռազմական ուժի օգտագործումը թույլ չի տա ամբողջությամբ ոչնչացնել դրանք: Այդ մասին, ինչպես տեղեկացնում է «Արմենպրես»-ը, հուլիսի 1-ին հայտարարել է ԱՄՆ-ի պաշտպանության նախարար Էշթոն Քարթերը՝ ելույթ ունենալով ԱՄՆ-ի զինուժերի շտաբների պետերի կոմիտեի նախագահ գեներալ Մարտին Դեմփսիի հետ համատեղ անցկացված մամուլի ասուլիսում:
Նա հաստատել է, որ ԱՄՆ-ը շարունակում է «պահպանել Իրանի նկատմամբ գործողությունների ռազմական տարբերակը»՝ բացառելու Իրանում միջուկային զենքի ստեղծումը: Սակայն հնարավոր ռազմական գործողությունը միայն «հետ կշպրտի իրանական միջուկային ծրագիրը», բայց թույլ չի տա ամբողջությամբ վերացնել այն, հայտարարել է Քարթերը:
Նրա խոսքով՝ «բնականաբար, ժամանակի ընթացքում ամեն ինչ կարելի է վերականգնել»: «Այդպիսով, հարվածը կդառնա Իրանի միջուկային ծրագրի հետագա զարգացման յուրատեսակ արգելակ, բայց թույլ չի տա բացառելու դրա վերստեղծումը ժամանակի ընթացքում»,- ընդգծել է Պենտագոնի ղեկավարը, հաղորդել է ՏԱՍՍ-ը:
Լուսանկարը`EPA