ՖԿՀՊ-ում մեկնարկեց Լայպցիգի համալսարանի սպորտային մենեջմենթի սեմինարը
ԵՐԵՎԱՆ, 29 ՀՈՒՆԻՍԻ, ԱՐՄԵՆՊՐԵՍ: Ֆիզիկական կուլտուրայի հայկական պետական ինստիտուտում մեկնարկեց Գերմանիայի Դաշնային Հանրապետության Լայպցիգի համալսարանի մասնագետների կողմից կազմակերպված «Սպորտային մենեջմենթ» թեմայով տասնօրյա սեմինարը: «Մենք պայմանավորվածություն ունենք Լայպցիգի համալսարանի, մասնավորապես սպորտային գիտության ամբիոնի հետ համագործակցությունը խթանելու վերաբերյալ: Այդ պատճառով խորացնելու ենք բոլոր սպորտային ուղղությունները: Մենք սպորտային մենեջմենթում դեռ նոր առաջին քայլերն ենք անում»,-նման կարծիք հայտնեց ՀՀ սպորտի և երիտասարդության հարցերի նախարար Գաբրիել Ղազարյանը, ով ներկա էր սեմինարի բացմանը:
Գերմանիայի Դաշնային Հանրապետության Լայպցիգի համալսարանի մասնագետներից Դանիել Էկերտ Լինդհամերը մեծ ակնկալիքներ ունի հայաստանյան սեմինարից: «Նախաձեռնության գաղափարը ելնում է այն մտքից, որ մենք սովորում ենք մեր ամբողջ կյանքի ընթացքում: Նմանատիպ հավաքների միջոցով մենք հնարավորություն ենք տալիս համալսարանն ավարտած մասնագետներին չհեռանալ մասնագիտությունից: Սպորտային մենեջմենթի սեմինարի հիմնական խնդիրն այն է, թե ինչպես կարելի է սպորտը ևս լավ կազմակերպել»,-«Արմենպրես»-ի հետ զրույցում ասաց Լինդհամերը:
«Եթե ամբողջ աշխարհում սպորտը մեծ թափ է հավաքում, ապա պետք կարողանանք ճիշտ կառավարելու և կազմակերպել այն: Եթե կա սպորտային շուկա, որտեղ պետք է գնանք և մտնենք, ապա մեզ պետք են որակյալ մասնագետներ: Նմանատիպ սեմինարների միջոցով հիմք ենք դնում մասնագետների ստեղծմանը»,-ասաց Ֆիզիկական կուլտուրայի պատմության և մենեջմենթի ամբիոնի վարիչ Անահիտ Հարությունյանը:
Գերմանական համալսարանի կողմից կազմակերպված սեմիաները կանցկացվի ոչ միայն Երևանում, այլ նաև դասընթացներ կլինեն Ծաղկաձորում, Սևանում և Դիլիջանում: Իսկ ահա հաջորդ տարի ՖԿՀՊ-ում կբացվի Հայաստանում առաջին սպորտային մենեջմենթի ամբիոնը: