Վրաստանում ՆԱՏՕ-ի գլխավոր քարտուղարին սպասում են օգոստոսին
ԵՐԵՎԱՆ, 26 ՀՈՒՆԻՍԻ, ԱՐՄԵՆՊՐԵՍ: ՆԱՏՕ-ի գլխավոր քարտուղար Ենս Ստոլտենբերգն այս տարվա օգոստոսին կայցելի Վրաստան եւ կմասնակցի Վրաստանի հետ համատեղ ՆԱՏՕ-ի ուսումնավարժական կենտրոնի բացման արարողությանը: Այդ մասին, ինչպես տեղեկացնում է «Արմենպրես»-ը, հաղորդել է հանրապետության պաշտպանության նախարարությունը:
Գերատեսչության տվյալներով՝ Վրաստան Ստոլտենբերգի այցի հարցը քննարկվել է ՆԱՏՕ-ի գլխավոր քարտուղարի տեղակալ Ալեքսանդր Վերշբոուի եւ Վրաստանի պաշտպանության նախարար Թինա Խիդաշելիի միջեւ Բրյուսելում կայացած հանդիպմանը:
«Հանդիպմանը որոշվել է, որ ՆԱՏՕ-ի գլխավոր քարտուղարը Վրաստան կժամանի օգոստոսին: Ալեքսանդր Վերշբոուն նշել է, որ Ենս Ստոլտենբերգի այցի շրջանակներում պլանավորվում է անցկացնել ՆԱՏՕ-ի ուսումնավարժական կենտրոնի բացման արարողությունը»,- նշվում է պաշտպանության նախարարության հայտարարության մեջ:
Դրանում նաեւ ասված է, որ «հանդիպմանը կողմերը քննարկել են եկող տարի Վարշավայում կայանալիք ՆԱՏՕ-ի գագաթնաժողովում Վրաստանին ՆԱՏՕ-ի անդամակցության գործողությունների ծրագիր տրամադրելու հեռանկարները»:
Ավելի վաղ Վրաստանի զինված ուժերի գլխավոր շտաբի ղեկավար Վախթանգ Քափանաձեն հայտարարել էր, որ Վրաստանի հետ համատեղ ՆԱՏՕ-ի ուսումնավարժական կենտրոնը մինչեւ 2015 թվականի սեպտեմբերը կբացվի Թբիլիսիի մերձակա Վազիանի ռազմակայանում, հաղորդել Է ՌԻԱ Նովոստին:
Լուսանկարը` Reuters