ԵՐԵՎԱՆ, 12 ՀՈՒՆԻՍԻ, ԱՐՄԵՆՊՐԵՍ: Հայաստանի ազգային պատկերասրահի տնօրենի թափուր պաշտոնի համար հայտարարված մրցույթում հաղթել է Արման Ծատուրյանը: Ինչպես «Արմենպրես»-ին տեղեկացրին ՀՀ մշակույթի նախարարության հասարակայնության հետ կապերի բաժնից, հայտարարված մրցույթին մասնակցել է երեք հոգի:

«Մասնակիցներն են եղել Արթուր Ավագյանը, Սաթենիկ Վարդանյանը և Արման Ծատուրյանը: Մրցույթն անցկացվել է երկու փուլով՝ թեստավորում և հարցազրույց: Մրցույթի մասնակիցները ներկայացրել են իրենց ծրագրերը: Երկրորդ փուլում պայքարել են Արթուր Ավագյանը և Արման Ծատուրյանը: Ընտրական հանձնաժողովի 10 անդամից Ծատուրյանին կողմ է քվեարկել 9-ը, դեմ՝ 1-ը»,- տեղեկացրին ՀՀ մշակույթի նախարարությունից: Հանձնաժողովը նախագահել ՀՀ մշակույթի փոխնախարար Արև Սամուելյանը:

Ազգային պատկերասրահի նախկին տնօրեն Փարավոն Միրզոյանի 65 տարին լրացել էր նախորդ տարի, և պատկերասրահի տնօրենի ժամանակավոր պաշտոնակատար էր նշանակվել փոխտնօրեն Անուշ Հակոբյանը: