ՀՀ պետական կառավարման ակադեմիայում մշակվել են մասնագետների վերապատրաստման նոր մեթոդներ
ԵՐԵՎԱՆ, 12 ՆՈՅԵՄԲԵՐԻ, ԱՐՄԵՆՊՐԵՍ: ՀՀ պետական կառավարման ակադեմիան պետական հանրային ծառայության համակարգերի համար ամենամասշտաբային վերապատրաստումներ եւ վերավորակավորումներ իրականացնող կառույցն է Հայաստանում: «Արմենպրես»-ի թղթակցի հետ զրուցում ՀՀ պետական կառավարման ակադեմիայի ռեկտոր Արսեն Լոքյանը նշեց, որ այժմ վերանայվում է այն մեթոդաբանությունը, սկզբունքները, որոնց միջոցով նախկինում իրականացվում էր հանրային կառավարման ոլորտի ներկայացուցիչների վերապատրաստումը:
«Նախորդ մեթոդն այլեւս չի արդարացնում իրեն, այդ պառճառով մենք իրականացնում են կարիքի գնահատում, այսինքն` փորձում ենք վերապատրաստման մեթոդը համապատասխանացնել տվյալ գերատեսչության հանրային ծառայողի վերապատրաստման թեմային եւ նրան ընձեռված վերապատրաստման ժամանակահատվածին»,- պարզաբանեց ռեկտորը:
Կարիքի գնահատման մեթոդաբանությունը մշակելու գործընթացում ակադեմիան համագործակցել է ՀՀ տարածքային կառավարման նախարարության, ՀՀ քաղաքացիական ծառայության խորհրդի մասնագետների, այլ գերատեսչությունների ներկայացուցիչների հետ: «Համատեղ ուժերով մշակել եւ մշակման փուլում է այս ծրագիրը, այն վեր կհանի բոլոր այն խնդիրները, որոնք առկա են այսօրվա հանրային ծառայության ոլորտում»,- ասաց Լոքյանը: Նա տեղեկացրեց, որ բացի վերապատրաստման մեթոդաբանությունից, ակադեմիայում նոր ծրագրեր են ներդրվել նաեւ ընդունելության քննությունների ձեւաչափում:
«Քննությունների ժամանակ իրականացվում է հոգեբանական թեստավորում, որի միջոցով հնարավորություն է ընձեռում դիմորդների մեջ բացահայտել այնպիսի հատկանիշներ, ինչպիսիք են կառավարելու, կազմակերպչական ունակությունները»,- պատմեց ռեկտորը: Նա նաեւ հավելեց, որ թեստերը մշակվում եւ վերլուծվում են կառավարման հոգեբանության ամբիոնի կողմից եւ ընդունելության քննությունների երկրոդ փուլում ներկայացվում են քննական հանձնաժողովի անդամներին: Նրա գնահատմամբ` հոգեբանական թեստավորման միջոցով հնարավոր է ստուգել ոչ միայն դիմորդի գիտելիքները, այլեւ անձնային հատկանիշները: «Սա կարեւոր քայլ է հաշվի առնելով այն հանգամանքը, որ այսօրվա դիմորդները մեր երկրի վաղվա կառավարիչներն են»,- ավելացրեց Լոքյանը:
ՀՀ կառավարման ակադեմիայում առկա եւ հեռակա ուսուցումն իրականացվում է հինգ` «Հանրային կառավարում», «Կառավարում (հանրային ֆինանսների կառավարում)», «Իրավագիտություն» , «Հոգեբանություն (կառավարման հոգեբանություն)»,«Քաղաքագիտություն (քաղաքական կառավարում եւ քաղաքական վերլուծություն) մասնագիտություններով:
Ակադեմիան ունի 500 ուսանող եւ մեկ տարվա կտրվածքով իրականացնում է շուրջ 1500 մասնագետի վերապատրաստում: Ակադեմիայում գործում է կրթության եռաստիճան` մագիստրոսական, ասպիրանտական եւ դոկտորական համակարգ:
Պետական կառավարման ակադեմիան իրավահաջորդն է ՀՀ կառավարման դպրոցի, որը հիմնվել է 1994 թվականի մայիսի 24-ին ՀՀ կառավարության որոշմամբ` Եվրոպական Միության ՏԱՍԻՍ ծրագրի տեխնիկական աջակցությամբ: