Ասիա-խաղաղօվկիանոսյան գործընկերության ղեկավարները քննարկել են ՆԱՏՕ-ի հետ համագործակցությունը
ԵՐԵՎԱՆ, 29 ՀՈՒՆԻՍԻ, ԱՐՄԵՆՊՐԵՍ: ՆԱՏՕ-ի հետ Ասիա-Խաղաղօվկիանոսյան գործընկերության (АР4) երկրների առաջնորդները քննարկել են միջազգային իրավիճակը և դաշինքի հետ համագործակցության խնդիրները, տեղեկացրել է Ճապոնիայի ԱԳՆ-ն։
Ինչպես տեղեկացնում է «Արմենպրես»-ը՝ վկայակոչելով «ՌԻԱ Նովոստի»-ն, Ճապոնիայի վարչապետ Ֆումիո Կիսիդան, Ավստրալիայի վարչապետ Էնթոնի Ալբանեզեն, Կորեայի Հանրապետության նախագահ Յուն Սոկ Յոլն ու Նոր Զելանդիայի վարչապետ Ջասինդա Արդերնը քննարկել են հնդկա-Խաղաղօվկիանոսյան տարածաշրջանի երկրների տեսանկյունից Ուկրաինայի իրադրությունը և դրա ազդեցությունը միջազգային հանրության վրա:
Նշվում է, որ չորս երկրների ղեկավարները միաձայն դատապարտել են Ուկրաինայում Ռուսաստանի ռազմական գործողությունը, ինչպես նաև «հիմնվելով այն բանի ընդհանուր ըմբռնման վրա, որ Հնդկա-Խաղաղօվկիանոսյան տարածաշրջանի և Եվրոպայի անվտանգության ապահովման հարցերը անբաժան են, պայմանավորվել են քառակողմ փոխգործակցության և ՆԱՏՕ-ի հետ համագործակցության և գործընկերության առաջխաղացման մասին՝ օգտագործելով երկրներից յուրաքանչյուրի առանձնահատկությունները, ինչպես նաև ՆԱՏՕ-ի և Հնդկա-Խաղաղօվկիանոսյան տարածաշրջանի միջև փոխըմբռնման ամրապնդման մասին»:
Չորս ղեկավարները Մադրիդում մասնակցում են ՆԱՏՕ-ի անդամ երկրների գագաթնաժողովին։ Վարչապետ Կիսիդան դարձել է ճապոնիայի նախարարների կաբինետի առաջին ղեկավարը, որը մասնակցել է դաշինքի գագաթնաժողովին։