1000х90.jpg (78 KB)

Կառավարությունը 3 միլիոն 230 հազար դրամ է հատկացրել ԱԹՍ-ի հարվածից տուժած Նորակերտին  

Armenpress 15:29, 18 Մայիս, 2022

 ԳԱՎԱՌ, 18 ՄԱՅԻՍԻ, ԱՐՄԵՆՊՐԵՍ։ Հայաստանի Հանրապետության կառավարության 2022 թվականի ապրիլի 22-ի համապատասխան  որոշմամբ 3 միլիոն 230 հազար դրամ է հատկացվել Գեղարքունիքի մարզպետարանին` 2021 թվականի հուլիսի 29-ի լույս 30-ի գիշերը ադրբեջանական անօդաչու թռչող սարքի հարվածից Գեղարքունիքի մարզի Նորակերտ բնակավայրի 31 բնակիչներին, բնակավայրի Ս. Սարոյանի անվան միջնակարգ դպրոցին եւ մանկապարտեզին պատճառված վնասի փոխհատուցման համար։

Ինչպես «Արմենպրես»-ին տեղեկացրին Գեղարքունիքի մարզպետարանի տեղեկատվության եւ սոցիալական ապահովության վարչությունից, հատկացված 3 միլիոն 230 հազար դրամից 3 միլիոն  65 հազար դրամը տրամադրվել է Նորակերտի 31 բնակարանների սեփականատերերին, 130 հազար դրամը՝ Ս. Սարոյանի անվան միջնակարգ դպրոցին եւ 35 հազար դրամը՝ մանկապարտեզին։

Գեղարքունիքի մարզպետարանի ֆինանսական եւ սոցիալ-տնտեսական զարգացման վարչության պետ Յուրա Մուշեղյանի հավաստմամբ՝ բնակիչներին հասանելիք գումարներն արդեն փոխանցվել են, իսկ կազմակերպություններին հասանելիք գումարները կփոխանցվեն պայմանագրային կարգով։

Խոսրով Խլղաթյան 



Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ contact@armenpress.am