Մարզպետարանում ամփոփել են նախորդ գյուղատնտեսական տարվա արդյունքները
ԳԱՎԱՌ, 27 ՀՈՒՆՎԱՐԻ, ԱՐՄԵՆՊՐԵՍ։ Գեղարքունիքի մարզպետարանի գյուղատնտեսության եւ բնապահպանության վարչությունում ամփոփվել են 2021 թվականի գյուղատնտեսական տարվա արդյունքները։
Ինչպես «Արմենպրես»-ին տեղեկացրեց մարզպետարանի գյուղատնտեսության եւ բնապահպանության վարչության պետ Մարտին Պետրոսյանը, նախորդ տարում հետեւողական աշխատանքներ են տարվել համայնքներում՝ անասնաբուժասանիտարիայի եւ բուսասանիտարիայի միջոցառումները ժամանակին եւ պատշաճ կատարելու համար:
Հանրապետությունում գործող կարգի համաձայն՝ անասնաբուժական սպասարկման միջոցառումներ են իրականացվել 6 հիվանդությունների նկատմամբ, ինչպես նաեւ իրականացվել են սահմանված ախտորոշիչ հետազոտություններ: Միջոցառումների իրականացման համար ներդրվել է 198 միլիոն դրամ:
Մեթոդական եւ խորհրդատվական աշխատանքներ են տարվել մարզի ազգաբնակչության հետ ՀՀ կառավարության կողմից իրականացվող գյուղատնտեսական ոլորտին տրամադրվող սուբսիդավորված վարկերի տրամադրման ուղղությամբ: Նշված ժամանակահատվածում շահառուներին տրամադրվել է 2 124 միավոր վարկ՝ շուրջ 3.8 միլիարդ ՀՀ դրամի չափով:
«Գյուղատնտեսական ռեսուրսների կառավարման և մրցունակության» ծրագրի շրջանակում մարզի 12 սպառողական կոոպերատիվներ ձեռք են բերել գյուղատնտեսական տեխնիկա եւ գյուղգործիքներ։ Վեց համայնքների սպառողական կոոպերատիվներին տրամադրվել է 21 միավոր գյուղտեխնիկա` 287.6 միլիոն դրամ արժողությամբ եւ 150 միլիոն դրամի գյուղգործիքներ: Մարզի 6 բնակավայրերում իրականացվել է ջրագծերի, փարախների, ջրհավաք ավազանների եւ անասնապահի տնակի կառուցում՝ 232 միլիոն դրամ արժողությամբ:
Ֆինանսական վարձակալության լիզինգի պետական աջակցության ծրագրի շրջանակներում մարզում հաստատվել է 19 լիզինգային հայտ՝ շուրջ 150.4 միլիոն դրամի չափով: Ձեռք է բերվել 32 միավոր գյուղտեխնիկա, որից 14-ը՝ տրակտոր:
2021 թվականին «Գեղարքունիք» ՋՕԸ- ի կողմից հողօգտագործողներին տրվել է 8 միլիոն 137 հազար մետր խորանարդ ջուր, տրված ջրի դիմաց հասույթը կազմել է՝ 89 միլիոն 507 հազար դրամ:
2021 թվականի աշնանը Գեղարքունիքի մարզին հատկացված մկնանման կրծողների դեմ պայքարի համար 615.52 լիտր «Բրոմադիալոն» տեսակի մկնասպան թունանյութերը մարզպետարանի կողմից ստացվել եւ բաշխվել է մարզի թվով 52 բնակավայրերի՝ 7 694 հեկտար տարածքում միջոցառումներ իրականացնելու համար: Մարզի 57 համայնքներում 34 000 հեկտարի վրա իրականացվել է գյուղատնտեսական մշակաբույսերի հիվանդություններով եւ վնասատուներով վարակվածության աստիճանի ուսումնասիրություն:
2021 թվականին մարզի 81448 հա վարելահողերից ցանվել է 40445 հեկտար, որը կազմում է մարզի ընդհանուր վարելահողերի հիսուն տոկոսը։
Խոսրով Խլղաթյան