1000х90.jpg (78 KB)

Հայ-սերբական մշակութային համագործակցությունը կընդլայնվի

Armenpress 16:30, 9 Դեկտեմբեր, 2021

ԵՐԵՎԱՆ, 9 ԴԵԿՏԵՄԲԵՐԻ, ԱՐՄԵՆՊՐԵՍ: ՀՀ ԿԳՄՍ նախարարությունում տեղի է ունեցել աշխատանքային հանդիպում Սերբիայի Հանրապետության մշակույթի ոլորտի ներկայացուցիչների հետ: «Արմենպրես»-ի փոխանցմամբ՝ այս մասին հայտնում են նախարարությունից, նշելով, որ քննարկվել են համագործակցության հնարավորությունները:

Պատվիրակության կազմում են եղել Սերբիայի դեսպանատան գործերի ժամանակավոր հավատարմատար Տատյանա Պանայոտովիչ Ցվետկովիչը, Բելգրադի Ազգագրության թանգարանի տնօրեն Տիյանա Կոլակ-Անտիչ Պոպովիչը, թանգարանի խորհրդական և համակարգող Սաշա Սրեչկովիչը:

Պատվիրակությանն ընդունել է ՀՀ ԿԳՄՍՆ մշակութային ժառանգության և ժողովրդական արհեստների վարչության պետ Աստղիկ Մարաբյանը: Հանդիպմանը մասնակցել են նույն վարչության մշակութային ժառանգության պահպանման և հանրահռչակման բաժնի պետ Գառնիկ Մոմջյանը և գլխավոր մասնագետ Նաիրա Կիլիչյանը:

Աստղիկ Մարաբյանը նշել է, որ հանդիպումը մշակութային երկխոսության նոր հնարավորությունների առիթ կդառնա:

Սերբ գործընկերները հայտնել են, որ իրենք արդեն եղել են Սարդարապատի հուշահամալիրում, այցելել են Հովհաննես Շարամբեյանի անվան ժողովրդական արվեստների թանգարան, ծանոթացել թանգարանների գործունեությանը:

Բելգրադի Ազգագրության թանգարանի տնօրեն Տիյանա Կոլակ-Անտիչ Պոպովիչի խոսքով՝ իրենք մշակութային համագործակցության բազմաթիվ ուղղություններ են տեսնում. մասնավորապես` ժողովրդական արվեստների ցուցահանդեսների կազմակերպում, թանգարանային ֆոնդերի պահպանության և փորձագետների փորձի փոխանակման ծրագրեր, ինչպես նաև ժողովրդական ստեղծագործության ոլորտի վարպետների ուսուցողական հանդիպումներ:

Պատվիրակության անդամները նշել են, որ Սերբիան վերջերս է վավերացրել ՅՈՒՆԵՍԿՕ-ի 2003 թ. «Ոչ նյութական մշակութային ժառանգության պաշտպանության մասին» կոնվենցիան, և այդ շրջանակում առաջարկել են համագործակցել ՅՈՒՆԵՍԿՕ-ի ոչ նյութական մշակութային ժառանգության ցանկերում համատեղ հայտ գրանցելու ուղղությամբ:

Հանդիպմանը դիտարկվել են նաև հայ-սերբական մշակութային կապերը գրահրատարակչության ոլորտում զարգացնելու հեռանկարները: Կողմերը փաստել են, որ հայ և սերբ հեղինակները պարբերաբար թարգմանվում են` համապատասխանաբար սերբերենից հայերեն և հակառակը, ինչը երկու ժողովուրդների մերձեցման և փոխճանաչման լավ միջոց է:

Սերբ գործընկերները նաև իրենց հիացմունքն են հայտնել հայկական պատմաճարտարապետական հուշարձանների մասին, որոնք վկայում են հայերի՝ հնագույն ազգ լինելու մասին: Այս համատեքստում քննարկվել են նաև մշակութային տուրիզմի զարգացման ուղիները:

Հանդիպման ավարտին որոշվել է հստակեցնել փոխադարձ ցուցահանդեսների կազմակերպման մանրամասները և ժամանակացույցը:

 

 

 

 



Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ contact@armenpress.am