Երկրաշարժից 33 տարի անց Գյումրիում դեռ անելիքներ կան. ՀՀ փոխվարչապետ
ԳՅՈՒՄՐԻ, 7 ԴԵԿՏԵՄԲԵՐԻ, ԱՐՄԵՆՊՐԵՍ: Երկրաշարժից 33 տարի անց Գյումրիում դեռ անելիքներ կան:
Ինչպես թոխանցում է «Արմենպրես»-ը՝ այս մասին Գյումրի կատարած այցի ժամանակ հայտնեց ՀՀ փոխվարչապետ Համբարձում Մաթևոսյանը: «Ցավոք, աղետալի երկրաշարժի հետևանքները դեռ չեն վերացել, բայց պետք է նշեմ, որ վերջին տարիներին Շիրակի ու Լոռու մարզերում իրականացվել են մի շարք ծրագրեր՝ աշխատանքներ են տարվել անօթևանների խնդրի լուծման հետ կապված: Նախատեսված է, որ 2022 թվականին դրանք ունենալու են շարունակական բնույթ: Խնդրի լուծման համար հաջորդ գործիքը սուբվենցիոն ծրագրերն են՝ Շիրակի մարզում այս երեք տարիների ընթացքում իրականացվել են նմանատիպ ծրագրեր՝ 8 մլրդ դրամի շրջանակներում»,-նշեց ՀՀ փոխվարչապետ Համբարձում Մաթևոսյանը՝ ընդգծելով Գյումրիում իրականացվող ճանապարհաշինական աշխատանքները, որոնք հաջորդ տարվա ընթացքում ևս շարունակական բնույթ կկրեն:
«Պետք է ևս մենք անգամ պարտավորվենք, որ առաջիկա տարիների ընթացքում անելու ենք հնարավորինս, որպեսզի օր առաջ լուծենք Շիրակում՝ հատկապես երկրաշարժի հետևանքով ծառացած խնդիրները»,- հավելեց ՀՀ փոխվարչապետ Համբարձում Մաթևոսյանը՝ վստահեցնելով, որ բնակարանաշինական խնդիրների հետ կապված ծրագրերի մասին ավելի ստույգ կհայտարարվի առաջիկայում՝ ՀՀ կառավարության՝ ՀՀ քաղաքաշինական կոմիտեի հետ նախատեսվող նիստից հետո:
Արմենուհի Մխոյան