Հեռուստաաշտարակի մոտակայքում խոշոր հրդեհ է բռնկվել
ԵՐԵՎԱՆ, 19 ՀՈԿՏԵՄԲԵՐԻ, ԱՐՄԵՆՊՐԵՍ: Երևանի հեռուստաաշտարակի մոտակա կանաչապատ տարածքում հրդեհ է բռնկվել: ՀՀ ԱԻՆ Ճգնաժամային կառավարման կենտրոնը այդ մասին ահազանգ է ստացել 17:46-ին: «Արմենպրես»-ին այդ մասին հայտնեցին Արտակարգ իրավիճակների նախարարությունից:
«Հոկտեմբերի 19-ին, ժամը 17:46-ին Ճգնաժամային կառավարման ազգային կենտրոն ահազանգ է ստացվել, որ Երևանի Նորք-Մարաշ վարչական շրջանում՝ հեռուստաաշտարակի մոտակայքում, հրդեհ է բռնկվել», - հայտնել է նախարարությունը:
Ըստ աղբյուրի՝ դեպքի վայր են մեկնել ԱԻՆ Փրկարարական ծառայության Երևանի փրկարարական վարչության հրշեջ-փրկարարական ջոկատներից երկու մարտական հաշվարկ և Հրդեհաշիջման և փրկարարական աշխատանքների կազմակերպման բաժնի օպերատիվ խումբը։
Հայտարարվել է հրդեհի բարդության «1 Բիս» կանչ: Դեպքի վայր է մեկնել ԱԻՆ ՓԾ Երևանի փրկարարական վարչության հրշեջ-փրկարարական ջոկատներից ևս երկու մարտական հաշվարկ։
Նշված տարածքում հրդեհի դեպք տարվա ընթացքում գրանցվել էր նաև հունիսի 25-ին: