Աստղաձորում կառուցվում է ոռոգման ջրատարի ներքին ցանց
ԳԱՎԱՌ, 24 ՍԵՊՏԵՄԲԵՐԻ, ԱՐՄԵՆՊՐԵՍ։ Գեղարքունիքի մարզի Աստղաձոր համայնքում ՀՀ կառավարության կողմից իրականացվող սուբվենցիոն ծրագրերի շրջանակներում կառուցվում է ոռոգման ջրատարի ներքին ցանց։
Ինչպես «Արմենպրես»-ին տեղեկացրին Գեղարքունիքի մարզպետարանի քաղաքաշինության վարչությունից` ծրագրի պայմանագրային արժեքը կազմում է 39 միլիոն դրամ, որի 65 տոկոսը հատկացրել է ՀՀ կառավարությունը, 35 տոկոսը՝ Աստղաձորի համայնքապետարանը։ Ծրագրով նախատեսված է երկաթյա կիսախողովակներով 2 143 գծամետր ընդհանուր երկարությամբ ոռոգման ներքին ցանց կառուցել համայնքի վեց թաղամասերում։
«Շինարարական աշխատանքները մեկնարկել են օգոստոսի 18-ին եւ կավարտվեն 2021 թվականի դեկտեմբերի ընթացքում։ Ծրագրի իրականացման արդյունքում կկրճատվեն ոռոգման ջրի կորուստները, ներհամայնքային ճանապարհները պաշտպանված կլինեն քանդվելուց»,-նշեց Աստղաձոր համայնքի ղեկավար Ռոբերտ Խաչատրյանը։
Խոսրով Խլղաթյան