Թունիսում հարաբերական անդորր է. Վաշինգտոնն ու Բրյուսելը կայունության կոչ են անում
ԵՐԵՎԱՆ, 27 ՀՈՒԼԻՍԻ, ԱՐՄԵՆՊՐԵՍ: Թունիսի մայրաքաղաքում հարաբերական անդորր է հաստատվել կառավարական զորքերի քաղաք մտնելուց հետո: «Արմենպրես»-ի հաղորդմամբ՝ այս մասին հայտնում է «Եվրոնյուզ»-ը՝ նշելով, թե այդ ֆոնին միջազգային հանրությունը զգուշավոր վերաբերմունք է ցույց տվել քաղաքական այն փոփոխությունների մասին լուրերին, որոնք տեղի են ունեցել երկրում նախագահ Կաիս Սաիդի որոշմամբ:
«Եվրոնյուզ»-ի հաղորդմամբ՝ Միացյալ Նահանգները կոչ է արել Թունիսի իշխանություններին հավատարիմ մնալ ժողովրդավարական սկզբունքներին, իսկ Եվրամիությունը՝ շուտափույթ կերպով վերականգնել ինստիտուցիոնալ կայունությունը Թունիսում:
Թունիսում քաղաքական ճգնաժամը հաջորդել էր սանիտարականին: Կորոնավիրուսից մարդկանց մահացության ցուցանիշը այս երկրում ամենաբարձրերից է աշխարհում: Վերջին շաբաթներին Թունիսում բողոքի զանգվածային ակցիաներ էին տեղի ունենում: Հուլիսի 25-ին Թունիսի նախագահը որոշում կայացրեց դադարեցնել խորհրդարանի աշխատանքը, զրկեց պատգամավորներին անձեռնմխելիությունից և պաշտոնանկ արեց վարչապետին: Ընդդիմադիր իսլամիստական «Էն-Նահդա» կուսակցությունը Սաիդի գործողությունները որակեց որպես սահմանադրական հեղաշրջում: