Տեղի է ունեցել Արցախյան պատերազմում նահատակված հերոս Հենրիկ Հակոբյանի անվան ջրագնդակի 1-ին հուշամրցաշարը
ԵՐԵՎԱՆ, 24 ՀՈՒՆԻՍԻ, ԱՐՄԵՆՊՐԵՍ: Տեղի է ունեցել Արցախյան պատերազմի ընթացքում նահատակված հերոս, Հայաստանի ջրագնդակի հավաքականի ավագ, մարզիկ Հենրիկ Հակոբյանի անվան ջրագնդակի ամենամյա 1-ին հուշամրցաշարը:
Ինչպես «Արմենպրես»-ին տեղեկացրին Հայաստանի ջրագնդակի ֆեդերացիայից, Հենրիկ Հակոբյանը ֆեդերացիայի հավաքականի մարզիկներից էր, ով Ադրբեջանի կողմից սանձազերծված 44-օրյա պատերազմի ընթացքում, հայրենիքի ազատության և անկախության համար մղված մարտերում զոհվեց քաջի մահով։
«Այս տարի հուշամրցաշարն ունեցել է յուրահատուկ ուղերձ՝ միշտ վառ պահել հայրենիքի և հայրենական սպորտի նվիրյալների հիշատակը՝ հանձինս Հենրիկ Հակոբյանի»,- ասվում է հաղորդագրության մեջ։
Ըստ աղբյուրի՝ Հայաստանի ջրագնդակի ֆեդերացիայի և «Դու Հայաստանին» բարեգործական հասարակական կազմակերպության միջև կնքված հուշագրի համաձայն՝ յուրաքանչյուր տարի հունիսի 17-ին, «Դու Հայաստանին» կազմակերպությունը կաջակցի Հենրիկ Հակոբյանի անվան հուշամրցաշարի անցկացմանը։