Էնթոնի Բլինկենը Գերմանիան ԱՄՆ լավագույն գործընկեր է անվանել
ԵՐԵՎԱՆ, 23 ՀՈՒՆԻՍԻ, ԱՐՄԵՆՊՐԵՍ: Միացյալ Նահանգների պետքարտուղար Էնթոնի Բլինկենը Գերմանիան անվանել է ողջ աշխարհում Միացյալ Նահանգների լավագույն բարեկամը: Ինչպես հաղորդում է «Արմենպրես»-ը, այս մասին Բլինկենն ասել է Գերմանիայի կանցլեր Անգելա Մերկելի հետ հանդիպմանը:
«ԱՄՆ-ն ողջ աշխարհում չունի ավելի լավ գործընկեր, ավելի լավ բարեկամ, քան Գերմանիան»,- հայտնել է նա:
ԱՄՆ պետքարտուղարը տեղեկացրել է, որ ի թիվս այլ հարցերի՝ կանցլերի հետ քննարկելու է Ռուսաստանին ու Չինաստանին առնչվող հարցեր: Նա հավելել է, որ ԱՄՆ նախագահ Ջո Բայդենն արդեն հաջորդ ամիս անհամբեր սպասում է Մերկելին Վաշինգտոնում:
Սպիտակ տունն ավելի վաղ հայտնել էր, որ Մերկելը Վաշինգտոնում կհանդիպի Բայդենին հուլիսի 15-ին՝ քննարկելու կորոնավիրուսի համավարակը, կլիմայական փոփոխությունները, տնտեսական հարցեր, ինչպես նաև միջազգային անվտանգությունը: