ԱԳՆ-ն մտահոգություն է հայտնել Երուսաղեմում շարունակվող բախումների կապակցությամբ
ԵՐԵՎԱՆ, 11 ՄԱՅԻՍԻ, ԱՐՄԵՆՊՐԵՍ: Հայաստանի Հանրապետության արտաքին գործերի նախարարությունը մտահոգություն է հայտնել Երուսաղեմում շարունակվող բախումների կապակցությամբ:
«Խորապես մտահոգված ենք Երուսաղեմում շարունակվող բախումների կապակցությամբ։ Կոչ ենք անում ներգրավված բոլոր կողմերին զսպվածություն ցուցաբերել` նվազեցնելու լարվածությունը և կանխելու քաղաքացիական անձանց շրջանում հետագա զոհերը»,- «Արմենպրես»-ի փոխանցմամբ՝ ասված է ՀՀ ԱԳՆ տարածած հաղորդագրության մեջ։
Իսրայելա-պաղեստինյան հակամարտության շուրջ իրավիճակը սրվել է ապրիլի կեսերից, իսկ մայիսի 7-ին Արևելյան Երուսաղեմում բախումներ են տեղի ունեցել իսրայելական սահմանապահ ոստիկանության աշխատակիցների և պաղեստինցիների միջև, երբ Իսրայելի ուժայինները փորձել են ի կատար ածել իսրայելական դատարանի որոշումը և վտարել որոշ պաղեստինյան ընտանիքների:
Իսրայելական կողմի տվյալներով՝ մայիսի 10-ի երեկոյից սկսած պաղեստինցիները սկսել են զանգվածաբար հրթիռային հարվածներ հասցնել իսրայելական քաղաքներին, օդային տագնապի ազդանշաններ են հնչել Աշքելոն և Սդերոտ քաղաքներում, ինչպես նաև պաղեստինյան անկլավներին սահմանամերձ բնակավայրերում:
Արաբական լրատվամիջոցներն էլ հայտնում են, որ Գազայի հատվածում Իսրայելի կողմից հասցրած պատասխան հրթիռային հարվածների հետևանքով զոհվել է 26 մարդ, վիրավորվել՝ ավելի քան 120 մարդ:
Կարծիքներ
Հարցազրույցներ
Փաստ մեկնաբանությամբ