Որոշվել է քաղաքական նշանակում կատարել. Սիմոնյանը՝ Մակունցին դեսպան նշանակելու մտադրության մասին
ԵՐԵՎԱՆ, 27 ՀՈՒՆՎԱՐԻ, ԱՐՄԵՆՊՐԵՍ: ՀՀ իշխանությունը որոշել է ԱՄՆ դեսպանի պաշտոնի համար քաղաքական նշանակում անել:
«Արմենպրես»-ի հաղորդմամբ՝ ԱԺ փոխնախագահ Ալեն Սիմոնյանն այս մասին ասաց ԱԺ-ում լրագրողների հետ զրույցում՝ անդրադառնալով դեսպանի պաշտոնում Լիլիթ Մակունցի թեկնածության վերաբերյալ քննարկումներին:
Անդրադառնալով դիտարկմանը, որ Մակունցը դիվանագիտական աշխատանքի փորձ չունի՝ Սիմոնյանն ասաց. «Նշանակումները լինում են քաղաքական և դիվանագիտական: Այս փուլում իշխանությունը ճիշտ է գտնում, որ կարող է քննարկել Լիլիթ Մակունցի թեկնածությունը: Ես վստահ եմ, որ ում թեկնածությունն էլ առաջադրեինք, միևնույն է, ինչ-որ բան ասվելու էր, ինչ որ պատճառ բերվելու էր»:
Նրա խոսքով՝ այս դեպքում որոշում է կայացվել քաղաքական նշանակում կատարել:
«Այն մարդկանց մեծ մասը, որոնք այսօր շատ բուռն քննարկում են Մակունցի թեկնածությունը, նույնիսկ չեն կարող ասել այսօրվա դեսպանի անուն ազգանունը»,- նշեց ԱԺ փոխնախագահն ու հավելեց, որ իրենց քաղաքական ուժի շրջանակում Մակունցի թեկնածության հարցով փոքրիկ քննարկում է եղել:
Սիմոնյանն անկեղծացավ՝ Մակունցն իրեն ավելի շատ դուր է գալիս որպես խմբակցության ղեկավար ԱԺ-ում: «Ես տիկին Մակունցի հետ աշխատել եմ նաև նախարար եղած ժամանակ, բայց ինձ ավելի շատ դուր է եկել աշխատանքը խորհրդարանում: Խորհրդարանական դիվանագիտության շրջանակներում ես տեսել եմ իր աշխատանքը: Ես տեսել եմ իր կապերը»,-ասաց նա:
Սիմոնյանը նշեց ԱՄՆ գործընկերների հետ Մակունցի կապերի մասին: «Ես տեսել եմ, որ այդտեղ կա հնարավորություն՝ ունենալու մի մարդ, որը կարողանում է «նույն դիվանագիտական, քաղաքական լեզվով» խոսել մեր գործընկերների հետ»,- ասաց ԱԺ փոխնախագահը:
Ազգային ժողովի «Իմ քայլը» խմբակցության անդամ Լիլիթ Մակունցը հաստատել էր տարածվող տեղեկություններն այն մասին, որ դիտարկվում է ԱՄՆ-ում ՀՀ դեսպանի պաշտոնում իր նշանակման հարցը: