Սաուդյան Արաբիայում նավթի բաշխման կայանի հրդեհը եղել է ահաբեկչական հարձակման հետևանք
ԵՐԵՎԱՆ, 24 ՆՈՅԵՄԲԵՐԻ, ԱՐՄԵՆՊՐԵՍ: Եմենի ԶՈւ խոսնակ Յահյա Սերին Twitter-ի իր միկրոբլոգում նշել է, որ Սաուդյան Արաբիայում «Արամկո» ընկերությանը պատկանող նավթի բաշխիչ կայանը թիրախավորել են «Երուսաղեմ 2» բալիստիկ հրթիռով:
Այս մասին խոսել է նաև Սաուդյան Արաբիայի իշխանական պաշտոնյաներից մեկը, ով չի ցանկացել ներկայանալ, հայտնել է, որ հրդեհը եղել է ահաբեկչական հարձակման հետևանք, որն իրականացվել է հրթիռով:
«Արմենպրես»-ը, վկայակոչելով Սաուդյան Արաբիայի «ՍՊԱ» լրատվական կայքը, հայտնում է, որ ըստ պաշտոնյայի՝ այսպիսի ահաբեկչական հարձակումների նպատակն է թիրախավորել համաշխարհային տնտեսությունը, նավթային պաշարները և համաշխարհային կայունությունը:
Սաուդյան Արաբիայում նոյեմբերի 23-ին տեղական ժամով 03:50-ին Ջիդդայի հյուսիսում գտնվող նավթի բաշխման կայանում վառելիքի բաքում հրդեհ է բռնկվել: Հրդեհի հետևանքով վիրավորներ կամ զոհեր չկան:
Մերի Վարդումյան