Կանադացի սենատորը կոչ է արել կառավարությանը ճանաչել Արցախի անկախությունը
ԵՐԵՎԱՆ, 28 ՀՈԿՏԵՄԲԵՐԻ, ԱՐՄԵՆՊՐԵՍ: Կանադայի Սենատի անդամ Լեո Հոսակոսը կոչ է արել Կանադայի կառավարությանը դատապարտել ադրբեջանա-թուրքական համատեղ ագրեսիան և ճանաչել Արցախի Հանրապետության անկախությունը: «Արմենպրես»-ի հաղորդմամբ, սենատորն այս մասին հայտարարել է խորհրդարանում:
«Կանադայի Սենատը կառավարությանը կոչ է անում անհապաղ դատապարտել Արցախի Հանրապետության դեմ ադրբեջանա-թուրքական համատեղ ագրեսիան, աջակցել Թուրքիա ռազմական արտադրանքի արտահանման մշտական արգելքին, ճանաչել Արցախի ինքնորոշման իրավունքը, և էսկալացիայի սրացման, ինչպես նաև խաղաղ հայ բնակչությանը շարունակ թիրախավորելու լույսի ներքո ճանաչել Արցախի Հանրապետության անկախությունը»,-նշել է նա:
Ավելի վաղ Կանադայի Արտաքին գործերի նախարար Ֆրանսուա-Ֆիլիպ Շամպայնը հայտարարել էր Թուրքիային ռազմական սարքավորումների մատակարարումը կասեցնելու մասին:
Սեպտեմբերի 27-ից Ադրբեջանը Թուրքիայի աջակցությամբ ռազմական գործողություններ էր սանձազերծել Արցախի դեմ՝ թիրախավորելով անգամ քաղաքացիական բնակչությանը թե Արցախում, թե Հայաստանում: Առկա են հաստատված տեղեկություններ, որ Ադրբեջանի զինուժի կազմում հայկական կողմի դեմ մարտերի մեջ են նաև Սիրիայից Թուրքիայի միջոցով բերված վարձկաններ: