Շիրակի մարզի երկրապահները պատրաստ են հրամանի դեպքում Արցախ մեկնել
ԳՅՈՒՄՐԻ, 27 ՍԵՊՏԵՄԲԵՐԻ, ԱՐՄԵՆՊՐԵՍ։ Շիրակի մարզի երկրապահները ամեն պահի պատրաստ են հրամանի դեպքում Արցախ մեկնել: Այս մասին «Արմենպրես»-ին հայտնեց Շիրակի մարզի Երկրապահ կամավորականների միության նախագահ Յուրա Ալեքսանյանը: «Հենց իմացանք լուրը, երկրապահները, ինչպես նաև երկրապահների մարզային խորհուրդը, շտաբներում սպասում ենք հրահանգին՝ մեկնել ու կանգնել Արցախի ժողովրդի կողքին»,-նշեց Յուրա Ալեքսանյանը:
Արցախ մեկնելու ցանկություն հայտնում են ոչ միայն երկրապահներ, այլ մեծ թվով երիտասարդներ, ովքեր նոր են վերադարձել ծառայությունից, ինչպես նաև ապրիլյան պատերազմի զոհերի ծնողներ: «Շատ երիտասարդներ են կամավորագրվել, նաև 2016 թվականի ապրիլյան պատերազմին զոհված հերոսների ծնողներ»,- ավելացրեց Յուրա Ալեքսանյանը:
ԵԿՄ Գյումրու բաժանմունքի նախագահ Իգիթ Զաքարյանը վստահեցրեց՝ թիվն ավելի մեծ է: «Շատերին ուղարկել ենք այս պահին տուն, անհրաժեշտությունը եթե լինի կկանչենք՝ բոլորս սպասում ենք Սասուն Միքայելյանի հրամանին: Փ՛առք ու պատիվ մեր ժողովրդին, մեր ժողովուրդն ինչպես միշտ ցույց է տալիս որ այս պահերին միասնական է: Մենք արցախցու կողքին ենք»,-ավելացրեց Իգիթ Զաքարյանը:
Սեպտեմբերի 27-ի վաղ առավոտյան շփման գծի ողջ երկայնքով Ադրբեջանն ակտիվ հրետակոծություն է սկսել: Հրետակոծվում են նաև խաղաղ բնակավայրերը, այդ թվում մայրաքաղաք Ստեփանակերտը: Բնակչությանը կոչ է արվել պատսպարվել: Ստեփանակերտը հայտարարել է, որ պատասխանը լինելու է համաչափ, և իրավիճակի ողջ պատասխանատվությունը կրում է Ադրբեջանի ռազմաքաղաքական ղեկավարությունը և անձամբ Իլհամ Ալիևը: Պաշտպանության բանակը հուժկու հարվածներով կասեցնում է հակառակորդի գործողությունները։ Ճշտված տղեկություններով՝ հառակորդն ունի մոտ 200 մարդկային կորուստ, երեք տասնյակին մոտ զրահատեխնիկայի կորուստ և երկու տասնյակին մոտ ԱԹՍ-ների և այլ սարքավարումների կորուստ: Արցախի խաղաղ բնակչության շրջանում կան զոհեր և վիրավորներ, Մարտունու շրջանում մեկ կին և մեկ երեխա են զոհվել:
Նախնական տվյալներով հայկական կողմն ունի 16 զոհ և հարյուրից ավելի վիրավոր:
Հայաստանում և Արցախում հայտարարվել է ռազմական դրություն և զորահավաք:
Արմենուհի Մխոյան