Մեր գործողություններն միայն պաշտպանողական չեն եղել. Արծրուն Հովհաննիսյան
ԵՐԵՎԱՆ, 27 ՍԵՊՏԵՄԲԵՐԻ, ԱՐՄԵՆՊՐԵՍ: Հայաստանի Հանրապետության համապատասխան պետական կառույցները մշտապես ինտենսիվ կապի մեջ են միջազգային կառույցների հետ: «Արմենպրես»-ի հաղորդմամբ, միասնական տեղեկատվական կենտրոնում ասուլիսում ՊՆ ներկայացուցիչ Արծրուն Հովհաննիսյանը նշեց, որ կապի մեջ են նաև ԵԱՀԿ Մինսկի խմբի համանախագահների հետ:
«Եկեք ես այս պահին չխոսեմ մեր զինված ուժերի մարտավարական գործողությունների մասին, արդյունքները բնորոշող տվյալներ չհաղորդեմ: Ասեմ, որ մեր գործողություններն միայն պաշտպանողական չեն եղել: Մարտն ավարտվում է, արդյունքները երևում են»,-ասաց Արծրուն Հովհաննիսյանը:
Նա անդրադարձավ նաև այն դիտարկմանը, որ բազմամարդ կամավորական խմբեր են մեկնում Արցախ: Արծրուն Հովհաննիսյանը նշեց, որ շատ շնորհակալ է բոլոր կամավորներից Հայրենիքին նվիրված աշխատանք կատարելու համար:
«Այստեղ մի կարևոր բան փաստենք, որ բոլոր աշխատանքները համակարգում է ՀՀ Զինված ուժերը: Ամեն ինչ պետք է իրականացվի ՀՀ Զինված ուժերի վերահսկողության ներքո»,-ասաց նա:
Սեպտեմբերի 27-ի վաղ առավոտյան շփման գծի ողջ երկայնքով Ադրբեջանն ակտիվ հրետակոծություն է սկսել: Հրետակոծվում են նաև խաղաղ բնակավայրերը, այդ թվում մայրաքաղաք Ստեփանակերտը: Ստեփանակերտը հայտարարել է, որ պատասխանը լինելու է համաչափ, և իրավիճակի ողջ պատասխանատվությունը կրում է Ադրբեջանի ռազմաքաղաքական ղեկավարությունը և անձամբ Իլհամ Ալիևը: Պաշտպանության բանակը հուժկու հարվածներով կասեցնում է հակառակորդի գործողությունները։ Արցախի խաղաղ բնակչության շրջանում կան զոհեր և վիրավորներ: Նախնական տվյալներով հայկական կողմն ունի 16 զոհ և հարյուրից ավելի վիրավոր: Հայաստանում և Արցախում հայտարարվել է ռազմական դրություն և զորահավաք: