Ազգերի համագործակցության գլխավոր քարտուղարը հրավիրվել է «Մտքերի հայկական գագաթնաժողով»-ին
ԵՐԵՎԱՆ, 14 ՕԳՈՍՏՈՍԻ, ԱՐՄԵՆՊՐԵՍ։ Հայաստանի նախագահ Արմեն Սարգսյանը նամակ է հղել Ազգերի համագործակցության գլխավոր քարտուղար, բարոնուհի Պատրիսիա Սքոթլանդին։ Ինչպես «Արմենպրես»-ին տեղեկացրեցին ՀՀ նախագահի աշխատակազմի հասարակայնության հետ կապերի վարչությունից, նախագահ Սարգսյանն անդրադարձել է «Մտքերի հայկական գագաթնաժողով»-ին և ATOM (Advanced Tomorrow) նախագահական նախաձեռնությանը՝ նշելով, որ դրանք նպատակ ունեն միջազգային մակարդակով խթանել տեխնոլոգիական և հումանիտար զարգացումը և կարող են որպես ներկայացուցչական հարթակ ծառայել նոր ու ոչ սովորական գաղափարների ու հայեցակարգերի համար:
Հանրապետության նախագահը Պատրիսիա Սքոթլանդին հրավիրել է մասնակցելու «Մտքերի հայկական գագաթնաժողով»-ին, որը նախատեսվում է անցկացնել այս տարվա հոկտեմբերի 10-11-ը և նվիրված է լինելու աշխարհաքաղաքականությանն ու արհեստական բանականությանը: Ընդգծելով անցած տարի անցկացված գագաթնաժողովի մեծ արձագանքները՝ նախագահ Սարգսյանը հույս է հայտնել, որ այն այս տարի ևս մեծ հաջողություն կունենա:
Նախագահական այլ նախաձեռնությունների համատեքստում, որոնք միտված են Հայաստանում գիտության, տեխնոլոգիաների և արհեստական բանականության զարգացմանը, նախագահ Արմեն Սարգսյանն անդրադարձել է ATOM ծրագրին՝ նշելով, որ արդեն իսկ դրա նկատմամբ հետաքրքրություն կա աշխարհի տեխնոլոգիական հսկա ընկերությունների կողմից, որոնցից մի մասի հետ առաջիկայում կստորագրվեն նախնական համագործակցության համաձայնագրեր:
Նամակի վերջում նախագահ Սարգսյանը նաև մանրամասներ է ներկայացրել վերջին շրջանում հայ-ադրբեջանական սահմանագոտու Տավուշի հատվածում Ադրբեջանի սանձազերծած ռազմական նախահարձակ գործողությունների վերաբերյալ, մասնավորապես ընդգծելով, որ հարևան երկիրը ոտնահարել է համընդհանուր արժեքները՝ անհաջող փորձ անելով լուծել իր կարճաժամկետ խնդիրները, այն դեպքում, երբ այսօր ամբողջ աշխարհը համախմբված է ընդդեմ համավարակի:
Ազգերի համագործակցությունը միջկառավարական կազմակերպություն է: Այն հիմնականում միավորում է նախկինում Բրիտանական կայսրության կազմի մեջ մտնող 54 երկրների բոլոր մայրցամաքներում։ Համագործակցության անդամների թվում են Միացյալ Թագավորությունը, Կանադան, Հնդկաստանը, Ավստրալիան, Նոր Զելանդիա, Հարավային Աֆրիկան Սինգապուր, Մալթան, Կիպրոսը, Ռուանդան և բազմաթիվ այլ երկրներ: Համագործակցության երկրների բնակչության ընդհանուր թիվը կազմում է մոտավորապես 2.3 միլիարդ, որն աշխարհի բնակչության մեկ երրորդն է: Համագործակցության անդամ բոլոր երկրների համախառն ներքին արդյունքը միասին կազմում է 10 տրիլիոն ԱՄՆ դոլար, որը համաշխարհային տնտեսության համախառն ներքին արդյունքի 14 տոկոսն է: Համագործակցությանը անդամակցությունը բաց է բոլոր այն երկրների համար, որոնք ճանաչում և ընդունում են նրա գործունեության հիմնական նպատակները. այն է՝ աջակցել և սատարել ժողովրդավար հասարակությունների և թափանցիկ ինստիտուտների կայացմանը, արդյունավետ կառավարմանը, մարդու իրավունքների պաշտպանությանը, օրենքի գերակայությանը, մրցակցային տնտեսությունների զարգացմանը անդամ երկրներում: Կազմակերպության ֆորմալ ղեկավարն է Մեծ Բրիտանիայի թագուհին։