Բնապահպանության և ընդերքի տեսչական մարմինը հերքում է Արմավիրում աղտոտված արագիլների մասին լուրերը
ԵՐԵՎԱՆ, 2 ՀՈՒԼԻՍԻ, ԱՐՄԵՆՊՐԵՍ: Վերջին օրերին Արմավիրի մարզում աղտոտված արագիլների մասին համացանցում տարածված գրառումներն ապատեղեկատվություն են:
«Արմենպրես»-ի հաղորդմամբ՝ այս մասին տեղեկացնում են Բնապահպանության և ընդերքի տեսչական մարմնից:
«Վերջին օրերին համացանցում տարածված աղտոտված արագիլների մասին գրառումների վերաբերյալ տեղեկացնում ենք, որ Բնապահպանության և ընդերքի տեսչական մարմնի Արմավիրի տարածքային բաժնի աշխատակիցները հեռախոսակապ են հաստատել գրառումներ կատարած օգտատերերի հետ՝ կեղտոտված արագիլների վայրը ճշտելու նպատակով: Նշված տարածքներում աղտոտված արագիլներ չեն հայտնաբերվել»,- հայտնում են ԲԸՏՄ-ից:
Տեսչական մարմնի մասնագետները պարբերաբար շրջայցեր են կատարում ՀՀ Արմավիրի մարզի Երասխահուն, Զարթոնք, Առատաշեն, Խորունք, Գրիբոյեդով, Ակնաշեն, Եղեգնուտ, Արևիկ և մի շարք այլ համայնքներում՝ կեղտոտված արագիլներ հայտնաբերելու համար։
Լիլիթ Դեմուրյան