1000х90.jpg (78 KB)

Քաղաքացին տեղաշարժման թերթիկը պետք է լրացնի անգամ տան կողքին գտնվող խանութ գնալիս․ փոխոստիկանապետ

Armenpress 15:04, 28 Մարտ, 2020

ԵՐԵՎԱՆ, 28 ՄԱՐՏԻ, ԱՐՄԵՆՊՐԵՍ։ ՀՀ-ում նոր տիպի կորոնավիրուսի տարածումը կանխելու նպատակով հայտարարված արտակարգ դրության շրջանակներում ազատ տեղաշարժի սահմանափակումների օրերին տնից դուրս գալու ցանկացած դեպքում քաղաքացիները պարտադիր պետք է լրացնեն տեղաշարժման թերթիկը՝ պատասխանատվության զգացումը բարձրացնելու համար։

«Արմենպրես»-ի հաղորդմամբ՝ մամուլի ասուլիսի ժամանակ այս մասին հիշեցրեց ՀՀ ոստիկանության պետի տեղակալ Հայկ Մհրյանը՝ անդրադառնալով քաղաքացիների կողմից հնչող մտահոգություններին, արդյոք տան հարևանությամբ գտնվող խանութ գնալիս պետք է ունենան տեղաշարժման թերթիկ, թե ոչ։

«Այդ թերթիկը քաղաքացիները պետք է պարտադիր լրացնեն տնից դուրս գալիս, անկախ նրանից գնում են իրենց տան կողքին գտնվող խանութ, թե ավելի հեռու գտնվող այլ վայր։ Տեղաշարժման թերթիկն ամեն անգամ լրացնելով մարդը կսկսի հասկանալ, թե ինչ է պատասխանատվության զգացումը։ Այդ ամենն այս գործընթացում օբյեկտիվություն կմտցնի»,- նշեց Մհրյանը։

Հայաստանում մարտի 28-ի՝ ժամը 10:00-ի դրությամբ կորոնավիրուսի հաստատված դեպքերի ընդհանուր թիվը 372 է: Թեստերից 2172-ը բացասական արդյունք է տվել:  Մարտի 26-ին արձանագրվել է կորոնավիրուսով հիվանդի մահվան առաջին դեպքը։ Հայաստանում մարտի 27-ին ժամը 10:00-ի դրությամբ կորոնավիրուսից ապաքինվել է 28 քաղաքացի։

ՀՀ կառավարությունը Հայաստանում արտակարգ դրություն է հայտարարել: Արտակարգ դրությունը գործում է Հայաստանի Հանրապետության ամբողջ տարածքում 2020 թվականի մարտի 16-ից, ժամը 18:30-ից սկսած մինչև 2020 թվականի ապրիլի 14-ը, ժամը 17:00-ն: Մարտի 24-ի ժամը 23:59-ից մինչև մարտի 31-ը, ժամը 23:59-ն ՀՀ ամբողջ տարածքում սահմանափակվել է մարդկանց ազատ տեղաշարժվելու իրավունքը:

 

 

 



Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ contact@armenpress.am